الثلاثاء 28 مارس 2017 م - ٢٩ جمادي الثاني ١٤٣٨ هـ
الرئيسية / أشرعة / الأدب الشعبي

الأدب الشعبي

صباحات المطر

خميس الوشاحي
يسعد صباحات المطر بعيونك
ياراس مال الشاعر المتفوّد
يام المهل والعقل ذا مجنونك
نشّر عتاباته حمام وعوّد
صبحك يقينٍ مستحيل يخونك
ما للعتب مدخل عشان يهوّد
ظنك كبير لا تخيب ظنونك
هالشعر فيك اتمسك ومتيوّد
ياملهمة غايب سنين بدونك
قلبي على الهجران ما متعوّد
هلا بعطرك بالقوام بلونك
مطر مطر هذا الرجوع يزوّد
طل النهار بمبسمك وعيونك
وتلعثم الشعر وكسب وتفوّد

—————————————-
رهان المشاعر
أحمد بن عبدالله المعمري

ضمدي لي جراحي لا يفوت الاوان
خوفي الجرح باكر يستغل الضـمير
في زنازين قلبك معتقل من زمــان
اطلقي لي سراحي هم قلبي يطير
لـ السما لـ الروابي للــهدو فالمكان
من هجير المتاعب لين ارهى غدير
في رهان المشاعر لا كسبنا الرهان
نطرح اللي كسبنا للرهان الاخـيـر
وان خسرنا خسرنا عمرنا امتحـان
للمصلي مساجد /لـ الرهابين ديــر
قسوة الارض دايم توجع الصولجان
ولـ السيوف الصقيله حد لكن شطير
من تردت حياته في زمـن عـنفـوان
انعكاس المرايا يــوم تــوه صغـيـر
لو ذوت من ظماها نبتت الاقحوان
حتى لحظة ذويها تجذبك بـالعبير
كم مدينه حزينه خاضعـه للـهـوان
ولا سألوها علامك جاوبتهم بخـير
كل شي ييتغير الا نــــبـع الـحنـان
والنظر حلم موجع في عيون الضرير
ضمدي لي جراحي يحكو الناس كان
البعد في زمان العشق متعب كثير

——————————————
القلب ما عاد ليّه

خليفه الحامدي

تقول لي لولا الحيا باجيك للبيت
وأقول لك هالقلب خذه .. ما عاد ليّه
شغلت فكري فيك لين استحلّيت
قلبي .. وهاك اللي تبقّى هديّه
من عام رحت وذا أنا ع العهد تمّيت
وثمار شوقي أينعت شوق وعطيه
يا متلفي .. باكورة العمر وأفنيت
روحٍ تضنكّ حضنها لين المنيّه
شفني قصدتك دون غيرك وخلّيت
ناسٍ على صدق المواصل بغيّه
تركت اللي ساقلي حبه وناديت
باسمك .. عساك تردّلي صدق التّحيه
واوفيت في حبّك وصنته وداريت
أسقيه ماي العين صبح وعشيّه
ورافقت طيفك يوم عنّي تخلّيت
عساي ألقى في طيوفك سليّه
واليـوم ويـنـَه مـَا زرَعْـتْ وتمـنّيـت
حِلمٍ رُويته لـو بقَـتْ نفسي ضـميّــه
أثركْ – وأنا المعْـتمـي – إبّي تسلّيتْ
وخلّيـتنـي بْالوَهْم عن العالم عــميّه
وأقول يِـا جَـرحٍ أنا أنـساك ؟ يا ليـتْ
ويا ليـتْ لـي نفسٍ لْشُـوفـكْ عصيـّه
قلت اصبري يا من عشانك تعنيت
واقري كلامي في عيوني برويّه
قبل اسألي عنيَ على وين مديت
ولا تنسي إنك فوق راسي عليه
العذر عذرك لا تقولي تماديت
ما بيني وبينك عهودٍ قويه
برّزت لك عيني وابها تقهويت
وغنمت لك من دمعها سحبٍ نديّه
وارجحت ميزانك وزدته ووفّيت
من نفس دايم في وصالك وفيّه
هدّي جموحك ما على غيرك أرسيت
والقلب قلبك يا الرياح العتيه
——————-
لوين .. ما تدري ؟!
خليفه الغافري

أصعب شعور يمر بك في حياتك
يبكي ألم كل شي فيك إلا عينك
حلمك ..قساوة واقعك ..ذكرياتك
أو ليل مل من السهر به حنينك
ولا قبل راسك تشيب أمنياتك
تتساقط احلامك برجفة يدينك
كل شي منك طاح الا ثباتك
باقي على باكر لعله يعينك
ودك تشوف ب فجر الاحلام ذاتك
و يرد لك هالصبر لو بعض دينك
أقسى من هموم الليالي سكاتك
و البوح يبقى بس بينك و بينك
تتشابه ف لحظه ملامح جهاتك
و لوين ؟ ما تدري ! ..تقودك سنينك

إلى الأعلى