الإثنين 23 يناير 2017 م - ٢٤ ربيع الثانيI ١٤٣٨ هـ
الرئيسية / أشرعة / الأدب الشعبي

الأدب الشعبي

حياة وجودك
سامحني يا الظل الخفيف الراقي
لو اضحت الشمس بخلايا عودك
ولو مال غصني ، وازعلت أوراقي
وتناثرت ما بين ( فقري ) و ( جودك )
لا يشغلك فكر” .. يبي إغراقي
ولا تحزنك ريح اعبثت بحدودك
ما اطيح أنا / وان طحت يبقى ساقي
متعلق” .. بين السما ووعودك
هذا أنا مفقود وسط اعماقي
وكفّي اظهرت لاجلك / عشان تقودك
يا مكثر العشاق يوم تلاقي ..
قلب” يشابه سلّتك وورودك
سامحتني ؟؟ أدري طعنك فراقي
أنا الوحيد اللي يداري (سودك)
يا مسندي ، وعروقي ، ومعلاقي ..
بالمختصر / هذي الحياة وجودك
وانا على ما قال لي خفّاقي :
أغنّي ل (فقرك) وأدق ل (جودك)

عبدالحميد الدوحاني

***

قلبي فضاك

جيتك على ركب الأمل يا الخل
الشوق درب وذي يدي ممدودة
مالي سوى وصلك يكون الحل
إن كان خير أو نقص والا زودة
يا أنت يا عطر الورد والبل
وحبال أيامن مضت مشدودة
ذاك التصابي وين وهجه فل
من هو مقيد كيف فك قيوده
يخفق عشانك قلب صبره مل
وهوه لأجلك ما خلفها وعوده
وش بك كذا أصبحت له محتل
قوة غرامك مع بقايا جنوده
طفل العشق من بيننا منسل
واحنا فشتات ولا قدرنا نعوده
النور ياضي في هذاك التل
يمكن بلاقي ما فقدت وجوده
لا رمت أبقى ولا قدرت أشتل
والعزم فيني خائرات جهوده
تعال من رحم الأماني وطل
قلبي فضاك ومسكنك وحدوده

سعيد بن خميس الرحبي

***

يا ضيق

يا ضيق عطني نَفَس من ثم عاودني
تعبت أجرّك مع الأنفاس وأتألّم
مريت هذه الدروب وكنت توعدني
إذا تعديت درب الصبر ..بتعلّم
وأشوفني في مكاني وأنت تجهدني
بالعكس كل ما أعدي الصبر أتبلّم
وأشوف ثلثين دمعي صار يجحدني
والثلث الآخر يخط الخد ويعلّم
وابسألك ليه هذه الناس تحسدني
وأنا الحزن يشتكي مني ويتظلّم
ماني بناقص حسد.. هالحزن ساددني
من ما معه حزن ؟؟. أنا أستاذ وأعلّم
لا عاد كافي.. إلين هنيه ويسدني
ما عاد بي حلم كنت أحاول أتحلّم
هو عاد فيها صبر.. هالصبر بدّدني
متى تجي يالفرج وتمر وتسلّم
تعبت أشاور بدمعي وأنت تزهدني
ما حننك هالبكاء ؟ وش فيك ؟؟ اتكلّم
أنا هنا لو بغيت تمر.. شاهدني
هذا مكاني إذا ليل الشقا ظلّم
يا ضيق كل ما يمر الوقت جدّدني
العمر لا من تبعثر كيف با ينلم
خلاص مابي نفس.. يكفيك تسردني
قصه بعيون الخلايق وجرح يتكلّم
مريت كل الدروب والحزن ساعدني
أعطاني هذه الدموع وقال لي سلّم

‫راشد‬ الضاحي

***

آخر أمل

البارحة وشبت بهالليل بركان
قام الحزن يجرح بهالقلب تجريح
وانا انادي كان لي ربع خلان
واليوم خلوني تناثرني الريح
يا هيه يا عالم انا كومة انسان
اطيح وامشي وان مشى الصبح اطيح
وبطيحتي هالليل كل واحدً بان
اون من فرقا المخاليق واصيح
اسود انا وقتي ولا به من الوان
سرح خفوقي من محبته تسريح
يالله يا المعبود يا عالي الشان
الجرح برح مهجتي زود تبريح
قمت اعزف بجرحي لهالناس الحان
وازيح همي بالشعر كل ما ازيح
وانا بداخل خافقي كومة ايمان
لكن صدري كنه بحزنه السيح
راحوا وقفوا والامل مابه اوطان
يوم الوطن حتى معي كله يصيح
اخر امل والليل اشجان ف اشجان
يمكن الاقي طيفهم وسط هالريح

حميد بن سعيد السعدي

إلى الأعلى