الجمعة 21 يوليو 2017 م - ٢٦ شوال ١٤٣٨ هـ
الرئيسية / أشرعة / الأدب الشعبي

الأدب الشعبي

افااا يابحر

على شاطي احلامك تناثرت شوق وتيه
لفيت المكان ورحت واسرارك اسرارك
ف صدرك حكي لكنك تكابر وتخفيه
وانا اسمع عيونك دون ما تنطق اخبارك
افا (ياوفّي) يابحر مع صادق التشبيه
نجا مركبك لكن عقب موت بحارك
هذْا وجهي الذابل تكرم وطالع فيه
صحاريه في رجوى ابتساماتك/ امطارك
وانا اللي تعودتك تقود الامل بيديه
ظهورك ظهور (البدر) واشعاره اشعارك
دخيلك قتل صمتك حضورك تعال ارثيه
عسى فالرثاء ذكرى وتنضاف لاسرارك

خميس الوشاحي
———————————-
عابر

إنقفل باب الصباح وتاه عابر
بأول الدرب وتلاشت ابنيه
انفطم مولود في ستة دفاتر
قبل لا يكمل حساب الاغذيه
شارعي مزحوم وحدودي دوابير
والظروف اللي بكفي خالية
والمطر من قمة أوضاعي عباير
خالف ضنوني غيومن ضامية
جيت ما فيني على المسحاب حافر
ماني قادر استرد العافية
من بعد ساره مساراتي خناجر
كل شي بهالمواني موليه
ساره اللي ساقها بايع تذاكر
من سواحل تبرها للهاوية
قبل سن الرشد وبلوغ المنابر
واعتلاها نجمتين وسارية
كان فيما قد نوا وارتاب جاير
ما حفض ذمه ولا صان ادعيه
ما رعى موال دم وصوت ضامر
ولا سماحه من يدينن حانيه
آه من وضع الوجوه بهالمعابر
كثرما هي مستضيئة مطفيه
في وجوه بهالزمن ما هي مخابر
تزرع القشه بدرب الساقية
من وقع صوره ابجداري حييت شاعر
استفز تأثيرها بالأوعية
صكت أبواب الصباح ومات عابر
بأول الشارع وطاحت ابنيه

عبدالعزيز بن عبيد البوسعيدي
————————
اقحم على جرحي

بعدي مع قلبك مثل مانت خابر
صدري فضا ما كل سهم” يطوله
ما احب اكون بدنية الناس عابر
انا الذي لا من حضر وقفوله
اغيب يمكن عن عيون المنابر
لكن شعري حاضر وصفقوله
من خلقت الدنيا وانا قلب صابر
فارس عصامي ما انهزم في سهوله
اقحم على جرحي واناديه ثابر
واضحك ونزفي ما لقا صبر طوله
حزني حظن صدر الورق والمحابر
ومن طالت الغربه غدا القلب دوله
صدري لغلطات الرفاقه مقابر
واللي خسر جوله بجدد لجوله
يوم اجهلو وشلون طبع المكابر
علمتهم وشلون معنى الرجوله
قلب” كسرني كنت اسميه جابر
ممثل وابدع بدور البطوله
ما قلت لك عايد مثل منت خابر
صدري فضا هيهات سهم” يطوله

عايد مرزوق العويس _ ألمانيا
———————–
ياغائبه

يا غائبه من عام وللا زياده
عن عين شاعرك القديم وجديده
يومك معه كنتي بالايام عاده
كلما يطالع فيك تطلع قصيده
ويسلمك بالحب عرش السياده
رغم التحاسد حولكم والمكيده
ما ينخسر لحظات أسهم سعاده
الا و يسحب من وجودك رصيده
واليوم غبران الغياب و جراده
دارت على داره وحشت حصيده
واصبح على برنامجك بالإعاده
يستعطف الماضي ويقرأ بريده
وان قل حيله يعتزي في مداده
لعل يوصل به صدى للبعيده
يا غائبه و الشعر هذا مفاده
لا تقطعي شاعر وتنسي جديده

عبدالله بن سعود الحكماني

إلى الأعلى