الخميس 19 يناير 2017 م - ٢٠ ربيع الثانيI ١٤٣٨ هـ
الرئيسية / أشرعة / الأدب الشعبي

الأدب الشعبي

قالت احبك
عبدالله‬ بن حمدان الكعبي

قالت احبك قلت مـا عـاد فيني
الحب من قامـوس عمري حذفته !
قالت علامك ؟ قلت لا تسـاليني
عـن ذنب طاوعت الزمن وأقترفته !
انا رجـل من دون حس .. أتركيني
احسـاسي المرهف رصـيد وصرفته !
قالت بعيش وياااك أجمـل سنيني
قلبـي وطن لو توصفه .. ما نصفته !
انسى شـتات الماضي وعيش فيني
فينـي ولـه مخزون بـي ما نـزفته ؛!
قلت الله يصلح خاطرك وش تبيني
من كثر ما لتّهبـي الحب .. عـفته !
لفي خمْار المستحـى .. واحـذفيني
الحب مـن قامـوس فككري حـذفته !

__________

بين و بين

يا حابس الجهد في روحك ولو لاهم
تبخر الجهد وتلاشى ف غمضة عين
طيبك وأطباعك وضحكتك محلاهم
إذا تردد صداها بين ( بين و بين )
إحترت بين السفر والقعدة .. إياهم
أفضل طريقة لكسر الوقت والروتين
بعض البشر رائعة وطيبه سجاياهم
ودك تعيشه معاهم هالوقت وقتين
واللي أذكره فبالي من مزاياهم
ما ينحصر بالكلام ولا توصفه العين
أحب للقلب من هو ف الحياة ساهم
يقسم رغيفه وقت ضيق الأمل نصفين
جميل لا طل صوتن من قرب ناهم
ويقول أنا جيت من منفى الزمان الحين

سعيد بن خميس الرحبي
______________________

يا غائبة

يا غائبة من عام وللا زياده
عن عين شاعرك القديم وجديده
يومك معه كنتي بالايام عاده
كلما يطالع فيك تطلع قصيده
ويسلمك بالحب عرش السياده
رغم التحاسد حولكم والمكيده
ما ينخسر لحظات أسهم سعاده
الا و يسحب من وجودك رصيده
واليوم غبران الغياب و جراده
دارت على داره وحشت حصيده
واصبح على برنامجك بالإعاده
يستعطف الماضي ويقرأ بريده
وان قل حيله يعتزي في مداده
لعل يوصل به صدى للبعيده
يا غائبه و الشعر هذا مفاده
لا تقطعي شاعر وتنسي جديده

عبدالله بن سعود الحكماني

_____________
عـلـيـك الله يــا دنـيـا

أحمد بن محمد المعمري

أنـا آسـف ومــن قـلـبــي تـراهـا حـالـتـي حالـه
شـعـوري جـرّتـه قـصـة تـهـد الـحـيـل والابــدان
تـهـز الـقلـب ؟ لا والله تـهـز الـكـــون وجـبـالــه
مواقف ضيّقت صدري وحزني في عيوني بان
تـخـيّــل شـخـص لا يـسـمـع أبـوه وعـمـه وخاله
ولا حـتـى بـعـد أمـه تـراهـا ضـاعـت الاذهـان
تصيح بصوتهـا (تـكـفـى) وكنه ما وخـذ بــالــه
تنادي بصوتها شداد وقلبه من حـجـر ما لان
تـنـادي بـس يـتـجـاهل ويـتـبـع قـول انــذالــه
يـتـابـع قــول انــذالٍ بـشـر لا ديـن لا إيـمــان
مـجـالـس لا ذُكــر فـيـهـا كـلام الله واجــلالـه
بـشـر مـا عـنـدهـم نـخـوه وكلمتهم بلا مـيـزان
وفـجـأة جـاتـهـم صـدمـه تـوفـى وشـد بـرحاله
تـوفـى والـسبب حادث شنيع ودَمْعَت الاعيـان
ابــوه يـصْـفّـق كـفـوفــه وطـاحـت كـل آمــالـه
وأمـه حـيـل تـتـحسـف وينبض قلبها شـفـقـان
عـلـيـك الله يــا دنـيـا وعـلـى شـداد وامـثـالـه
وعلى من سبب الفتنه وعلى من حرّض العصيان

بلا عنوان

أماني الراسبيه

أنا مع باقي أنفاس البشر لكن بلا عنوان
واشوف الناس من حولي مدينه بابها عيني
وادور عن تفاصيلي وأنا في داخلي أنسان
جهل رغم الذي حولي أنا في وقتها ويني
أنا كل البشر لكن ابي عطف البشر ربان
ﻷن همومي أمواج البحر ليته يرسيني
انا وإن تاهت أفكاري ابي للمعرفه برهان
ابي ما يجعل المعنى يوضح لي قوانيني
مدام المجتمع عزه يكون من العطاء بنيان
عرفت إن الامل باقي وغيم الحب يرويني
تعبت أني أضمد مانبش فيني الجرح كتمان
تعبت وليتني أقدر لأن الخوف يحويني
لعبت بدور يعنيني ولكن اجهل الاتقان
ولعب بي دور يعنيهم ولكن ما رسى فيني
اشوف الشي لي فكره واشوفه غير بالالوان
ولا احدٍ ثبت دروبي لو ان الشي يعنيني
ابي استيقن الرسمه مع الصوره مع العنوان
ابي اشبك كتاباتي وخط الحرف بيديني
انا ما ابيك تجبرني ولو فـِي خطوتي غلطان
ولو بحساس تكسبني على الغلطه تمشيني

إلى الأعلى