الخميس 25 مايو 2017 م - ٢٨ شعبان ١٤٣٨ هـ
الرئيسية / أشرعة / الأدب الشعبي

الأدب الشعبي

يصبح بك الشعر فينيق
يا صُور هذا الشطَّ ما يوسع الضيق
اشكي لمين ان ضاق صدْر الليالي
ماقلت لك والقلْب فرقاك مِا يْطيق
لنِّ الذي يسْكنْك غالي وغالي
جيتك لقيت دْموع عيني مطاليق
قفَّت على رملك تسابق ظلالي
آقول وينه من سرى بالمعاليق
مَكانهَ بْصدري إلى اليوم خالي
حنًّيت له وابواب وصله مغاليق
خلاني احيا العمْر دونه لحالي
احلامنا في البحْر ماتت غواريق
ما عاد قلبي بالسواحل يبالي
يا صُور يا صورة مَاتحْتاج تعليق
انتي مثِل ما انتي عروسة خيالي
الحزْن ما تخفيه كل المساحيق
مهما تجمَّلتي بكِ الْحزْن حالي
يا درةٍ يصبح بك الشعْر فينيق
غني القصيد وْنوّخي لي جمالي
آحسّ بك حزنٍ من رْمالكِ يْفيق
يْقلّب أوجاعي من أول وتالي
وآحسّ هذا الشطّ ما يوسع الضيق
من هو يمش احزان سود الليالي
يا صُور تدرى وادري العمْر تفريق
بسَّ الحنين يْجيب صوبك رحالي
عبدالعزيز العميري
————————
زمان الأمس ..

عبدالعزيز بن عبيد البوسعيدي

داني ويا داني
كاسر ورحماني
مشرق شعاع الشمس
صوت اشتعال الامس
داني ويا داني

( زمان البحر يللي دايم ما ننساه )
زمان النخل يللي دايم ما ننساه
زمان السفر يللي دايم ما ننساه
زمان السهر يللي دايم ما ننساه
زمان اللال
واليامال
والتغرود
والهمبل
زمان النغمة اللي تشتغل فينا
الين انهيم في واحة مرابينا
مع الغصن النظير وريم وادينا
ونعبر صعب الامواج
من مينا الى مينا
على مركب شراعه حرف
واحبا له اسامينا
صباح الخير يا غناية طريقة وسالفة رحلة
رقص عذقٍ على أجمل نغم واتمايلة نخله
الى ان طاح موراد وجمعنا النور في جزله
وطل الليل باوراقه سأل من شاف عبدالله
ورد الحاضرين اليوم اهو سافر بحفظ الله
قديم الصوف يا الثوب الجميل
كبير احساس يا معدن اصيل
مدينة من تعابير وصهيل
نغم جال ابروابينا نسيمه
رسم بأعلا سمانا أحلى تيمه
وصب فيثارته موزه وسليمه
على التلي ومشط الياس
اذا الميدان عني قوم يا حميدان
ضوت جمرة تحدي وصافحت ندان
تلاقوا والهدف واحد
بعشره دائمه وصحبه
بدو اللعبه
وصاحوا والهدف واحد
بسم رب الكون خالق هالفلك
نبتدي اللعبه وهالعالم عيون
من معين اجداد نثري المعترك
جونا موروث والميدان عون
فايز يغني وخاسر كش هلك
بتعوض عالمدى وباكر تمون
لال أي لالي واي لالي ولك
مقصبن عالي ولا ينساق دون
بكره تعبرهالبحور ابمحملك
رايقن هالكيف والسايق فنون
عامره من كل لون
جامعه صبح ومزون
مستفيقه ما تغطاها النعاس
ولا تساما في حواريها اليباس
في يديها الف فاس
على التلي ومشط الياس
وصفريه يا علي الراس
الى اخر نبض وانفاس
سرى بقلوب
صحى النايم الغافي
وشق دروب
وسافر مع تصاويره لابعد دار
وسافر شايلن اسم وهوية دار
ولا قا كل ترحاب ورضى ومقدار
من عين تبصبر أفئده ممدوده
اتقدر المغنود وتسد عوده
كل ما زهى بمراتيه ومقصوده
واحيا تواريخ وسنن معدوده
يا فنون الامس
يا روائع حس
ما نسينا مرايتك
ما كسرنا هامتك
صرنا نبني لك بيوت
عن تموت احكايتك
عن تموت اسفارنا وأجمل طريق
عت تموت افراحنا في يوم عيد
عن يتوه اصحاب ويسافر خليل
عن نتوه وما نلاقي أي دليل
عن نعيل
في فضا الكلمه وموالن طويل
في صدى الحكمه وتاريخن جميل
في تعايشنا مع شعوب ورعيل
في ملامح خالده ال يوم الرحيل
———————-
الليالي حالكه

عامر العمري

يا شمس يومي أشرقي لاتغربي
الجو بارد والليالي حالكه
ذوبي دفاء مدي الأشعه وأسكبي
الجسم منهك والمشاعر منهكه
في ضي وهجك با أحاول أختبي
كي ماتبقى في الهواء أستدركه
الفوت حاجه مقلقه لو مربي
يقضي على أخر قوى متماسكه
واللي ربشني والصلاة على النبي
راعي الواحظ والعيون المهلكه
طايش مراهق بي جفل مثل الضبي
كلما بنية ود أبغي أمسكه
خلاني أتصرف معه مثل الغبي
أو كالمغفل كل موقف حركه
والكوره اللي اصبحت في مضربي
مني بخفه اختطفها وفبركه
محتار وهمومي تعدت منكبي
وصرت عالق وسط حاله مربكه
كله بدعوة رمش متعلي أبي
من طرف أكحل ماقدرت أتمالكه
غاده عسيه عاندت مثل الصبي
استدرجتني درب ماحد يسلكه
وأنا ترى ماكان هذا مطلبي
ولاأحب السير وسط الدربكه
بس هكذا حظي وقسمة مكسبي
هذا النصيب اللي أنكتب لي أملكه
قل يامصيري وين منك منصبي
لي شاءت الأقدار أن لا أتركه

——————–
صفر ع الشمال
حميد بن سعيد السعدي

هذا رصيد الحب صفر على شمال
يا نور عيني والجروح العليله
خايف على حبك يضيعك بالرمال
من هم وقتي كم اقدر اشيله
لا تقطع الماضي ولا معه الامال
وان ملت ياخي فيني الفين ميله
وين اللسان اللي حكى من بعد قال
باقي معك طول العمر يا خليله
حبك فقلبي باقي دوم ما زال
يا كيف قلي كيف يلقى دليله
ولا العشق ميت بقلبك بتمثال
ما حس فيني يوم قلبي قتيله
وين الهوى وينك الا طيب الفال
وين الهوى وين الليالي الجميلة
لا يشمتوا فينا ترى اليوم عذال
وانت بعيوني صرت كلك قبيلة
كم كنت اضرب في هوانا بالامثال
واليوم صرت اليوم من دون حيلة
اثبت لقلبي حبك بصدق الافعال
واسرج على ميدان هالحب خيله

إلى الأعلى