الإثنين 29 مايو 2017 م - ٣ رمضان ١٤٣٨ هـ
الرئيسية / أشرعة / الأدب الشعبي

الأدب الشعبي

صدمة فراق

يا فرحتي بالامس ياضيقي اليوم
ياليت كل المقبل يكون لي أمس
ايام مستانس ولا أعرف هموم
مصادق الاحساس والشعر والشمس
شمس ٍ تطل وتربك غيوم ونجوم
وتظلني من ضيها ..رموشها النعس!
ريحانة ٍ من عطرها يسكر القوم
وشلون لويُقطف من اطرافها الملس!
اهيم في وجه ٍ به السحر مرسوم
وشفاه ياربي العفو طعمها دبس!
كنه ثمار الشبس فــ مْزارع الروم
ماخذ مزاره من اصابيعها الخمس!
اقدّم الاوصاف والبال مهموم
صدمة فراق ٍ كنـّها الذل والحبس
اقاوم الصدمات لكنّ مااروم
اصادم الافكار والخاطر العمس
مرحوم يامن مات مرحوم مرحوم
إلا محبتـْك العظيمة هي الغرس
اسقيه من قلبي/ وشرياني غيوم
يالين ميعاد النفَس يترك النفس

ناصر الغيلاني
_____________________

يا نايحة جدي

يا نايحة جدي ومات الجد
واحنا نشل بلالنا الاحلام
من برجنا العالي لصوت الرعد
و(اتفاقنا) تهزم عمى النيام
ف عروقنا جمر وحنين وبرد
وعذوق صبر.. وفرحة الأيتام
للعيد في صدر الاماني الجرد
مثل الذي ضاقت به الانسام
يا قرية الحاجه.. ولعب النرد
كفي سرق مني رضا الأيام
يا قرية العالين.. فوق السرد
برجك وقف يشكي لنا الاعوام
هذا اخوي السالم المحتد
لابس (حزاقه)..واقفٍ قدام
متمصر بعدلك ولا يرتد
يرسم خدودك يا سهول الزام
نشرب زلالك يا جبال العد
لا صار مغلينك ترس وحسام
محروم من خنجر بخصر الود
يوم الخناجر تحرس الاوهام
يوم (المخمس) ما تشيله يد
الا عشان نجامل الابهام
يا نايحة جدي كفانا الجد
نمزح معك يا قرية الاحلام

مختار السلامي

_______________________

سواليف الغرام

على طاري سواليف الغرام وحسرة العشاق
انا مشتاق لك هيا تعالي عالجي شوقي
انا اكثر عاشق ن يشعر بموت وسكرت الأشواق
وانا الجاثم على صدر الغياب بكيفي وذوقي
انا اللي قلبه يعيش الخريف ويفقد الاوراق
ابا اسقي كل اشجار المحبه من دمع موقي
انا يا فاتنه مسك العنا من داخل الاعماق
انا الشعر العميق اللي تلعثم فيه منطوقي
انا اللي في غيابك ما قدرت اضحك على الاطلاق
وانتي الساكنه بين الظلوع وداخل عروقي
انا التعبان من كثر التعب وحضورك الترياق
دخيلك كيف بشرح لك وانتي تعرفي عوقي

علي الراسبي

____________________

كومة أماني

جالس
على كرسي زماني
ما معي
الا
بقايا من صبر
وايام خضراء
جنبها
كومة أماني
وانت سالي
يا أناني
رصيدك افراح
ومزوحات
وهلاهيل
وأغاني
ومنغمس
في نهرك
اللي من ترف
وماتعاني
مثل ما
خلك يعاني
ليت تنزل بس
من برجك
وتتفقد مكاني
كان تاخذ
من صور
واقع زماني
ولا ترضى
تخليني
على كرسي زماني

عبدالله بن سعود الحكماني

_____________________

نظرة إعجاب

قاسي كذا محروم لهفه وغيره
هاذي سنين وما انفتح للوصل باب
اتذكر امال الصغار الكبيرة
واتذكر الموعد وانا اقول كذاب
وأتذكر أني قلتها يا خطيره
يوم استطاع الدمع ينزل بلا أسباب
يوم اكتشفت ان الدموع الكثيره
اللي مطرها عطّر رموش واهداب
كانت ودمعتها مثيره مثيره
فيها يمر الشارع لبيت الأحباب
وأتذكر أني كنت قصه قصيره
لكنها تكبر على مولف كتاب
زحمة شعور ونبض حاله وسيره
ليل ورومانسية وتأنيب وعتاب
كانت بلمسات المشاعر خبيره
حلو الحكي منها للالباب نهاب
ماهي من اللي ذوقها تستعيره
كلماتها مثل العسل شهد ينساب
محور حديث الاوله للأخيرة
النظره اللي بيننا نظرة اعجاب

عبدالعزيز الرميحي

إلى الأعلى