السبت 21 أكتوبر 2017 م - ١ صفر ١٤٣٩ هـ
الرئيسية / أشرعة / الادب الشعبي

الادب الشعبي

غياب

مع كل الوجع في داخلي.. ياراحله … لاوين..؟
كأنهْ ما يهمك لوعة الهجران وحنينه..!!
تصدِّين الوداد اللي جمع بالعاطفه قلبين
وتنسي في عنادك حلم واعد..كيف تنسينه؟
تيمم بعد وعدك من عفاف الطهر لو تدرين
ويمم للقاء قبل المعاد.. ولارجع .. وينه ؟
خذتهُ الأُمنيات اللي توارت في الجفا والبين
ذبل غصن المشاعر والأمل جفت بساتينه
تعالي نقطع أسباب الغياب ونقسمه نصفين
تعالي نجمع أطراف الوداد ولا تصدَّينه
سكني البعد وأطيافك معي ما فارقتها العين
ترى لازال قلبي بالوله تنبض شرايينه
ترى وهج الغرام اللي أضمه مااْنطفأ للحين
أمانه لو تردِّي ياغلا روحي وتروينه
تعالي قرّبي نصف المسافه والعتب بعدين
ربيع العمر من عطر التلاقي تزهر سنينه …

حسن الرواس

_______

عين القروم

ليه في عين القروم استنجدت نجمة وليل
وليه كان الحبر ادعج من بقايا الليل ذاك
الملل ماهو متاهك،، انت لك تيه الهميل
لا هما ديمك وصار الجدب يستثقل ظماك
قل لي أن الصبح لوح في طرف عابر سبيل
واستطار الصوت كل ما هزت الورقا صداك
وان قطعة من هزيعك، توقظ جذور النخيل
والشبابيك القديمة، و شي من ريحة غلاك
الملل ماهو متاهك، انت لي ظلن ظليل
النوى برقه قليلٍ ، والهوى نوه،، دعاك
لو يهب الشوق صاحوا ” يا لحى الله الرحيل”!
له دبيب الجمر يومٍ يشتعل من غصن راك
ناهل الجفوات منهو،، ينهل الشي القليل
و موردٍ شحت طروفه، من عميقه ماعطاك

هجير
________________

حيرت فيني الاجوبه

عطيت لك حريتك وافعل حبيبي ما تشاء
مسحت كل الذكريات اللى توصلني إلك
ما هو تغلى هالقرار ولا طلب وإلا رجاء
البارحة دقت براسي وقلت يالله استهبلك
إذكر حبيبي لك وفي والناس ما كلها سواء
صرت النجوم ولا خفاء ادور في هذا الفلك
صرت الامير لحضرتك وانته ولا عندك ولاء
حيرت فيني الاجوبه من كثر ماني اسالك
ما تدرى ان الحب يعني ينوصف لك ابتلاء
ربي بلاني بمملكة وانتى قرينة هالملك
احيان من كثر الزعل توصل معي حد الجفاء
واحيان ما توصل ولكن ويش اسوي اهملك؟
علمتني مشي الانامل والقلب اسمة صفاء
وعلمتك اني كيف ازور الكون واقدر اوصلك
ياماخذه سهمين من حالى على رحلة هجاء!!
أقول عمرى راح وانتى يالحبيبه هاردلك
عطيتك انفاسي كذاء وقلت هذا لك دواء
روحت عنك كم يوم وغبت مابي اخذلك
كنت اختبر ضلع المعين في مساحه الانحناء
ما كنت ناوي من جنوني استفزك واقتلك
قصدي اشوفك بس وانتى لابسة ذاك الرداء
اللى توشح في خطوطة المستقيمة واعذرك
يامملكة فصل الربيع ونفحة اجواء الشتاء
امــا يدفنوني هنا وإلا العمر كلة معك…

سالم الريسي
_________

سكر قصب

يا ريحة الورد والريحان والياسمين
يا خلطۀ الشاي والزعتر وسكر قصب
يا بهجۀ النفس وينك عاد ما تسألين
من يوم رحتي وربك سيل دمعي سكب
أخبرك في غيابك زاد فيني الحنين
ما اصدق اللي يقول .. إن السكوت الذهب
تلخبط الفكر عندي بين شك ويقين
هذي عجائب زمن .. والا زمان العجب
كان الهوی ، ف ، اتساعه واحتضاره يبين
وصار الهوی في غيابك ممتلي بالعتب
لمي شتاته إذا باقي أمل ترجعين
إن ما عشاني .. أكيد انه عشانك وجب
تصدقي ما عرفته إتجاهك لوين
إن كان وفر علي هذا العنا والتعب
أقفر دروبن خطاك تمرها من سنين
يمكن تمري بها ذكری بنفس الدرب
يا نفحۀ الورد والريحان والياسمين
يا خلطۀ الشاي والزعتر وسكر قصب

سعيد بن خميس الرحبي
________________

حلم الطاهرين
صالح بن سعيد السلطي

مـن على قـلبي يمـروا العابرين!!
والسؤال الصعب وين مسافرين؟!!
ذاك وقتي صار أوجاع السفر
وتلتقي الآمال ونبقى ساهـرين
يا ألم خليّ متاعك ع البعيد
لا تجي بعيون حلم الطاهرين
كم عرفنا والوهن حمل ن كبير
قوّسه ظهر الزمن وأصبح حزين
والجفا يظهر تجاعيد وألم
صابـرين وصابـرين وصابرين!!
خلنا نرسم على طهر الحياة ..
للأمل وجه السعادة للسنين
الحــياة حلــوه ونجعلها صفاء
تحزن ومن أجل نسعد آخرين
يالحياة لا تنظري بثوب البعاد
حتى وإن صاب القَلبْ شوق وأنين
أغرسي بذر الفرح تضحك عيون
تنبت الأغصان وتثمر بعد حيــن
للحكاية وجه حالم بالحياة
ما اجملك آه الحياة ومعجبين
في وسط قـلبي يناموا العابرين!!
وأصعب اللحظة لو همْ مْسافرين؟!!

إلى الأعلى