Alwatan Newspaper

اضغط '.$print_text.'هنا للطباعة

الأدب الشعبي

المدى هذا الشفق

أحمدالجحفلي‏

المدى هذا الشفق
المدى وجه الغسق
وامتداد الضوء
مابين السماء والأرض
وأنْفاس الأرق
جربيني آخذ الغيمة جَمَرْ
يالحكاية المذهله..
حيرة الواهم صلاة الأسئله
ثورة الحب إختصار
للرضى للرفض
للنسيان ولهاث الوله.

آه ياوجه القصائد..
الشموس اللي علي مرت
قَبَلْ ماأعرفك كانت تظن..
انها تشبعْ مداي
وانها لو تسكب اللحظه سنأ
في عيني..
ممكن انّها تصبح رداي
وأنها لو بخّرت في فمّي أنفاسي..
يصير لها غناي..
وأنها لو حرّقت جلدي وأنا نائم
أفز أصحى لها..
هكذا ظنت..
إيه ظنت..
ماتظن إني..
بحط عيونها الدعجا وراي.
وبمشي للظل القريب
ظل شجره رمشها يهذي هناك
كانّها خصلةْ شَعَرْ طارت..
الى منفي سماي.

آه لو أقدر أصير
صبحك الأول
وممساي الأخير
يالسلام
ياانسكاب النور..
في وجه الظلام
كان ودي لو أغيّر فيني شي
مثل الكلام
صرت أحج السحب
فمّي مروحه
أنفخ على عين الغمام ..
ودي أخطف..
رمشها الناسك.. ظما
واسحبها
من حضن السماء
واحطها بجيبي حمام

وإنتي يالخمس الحروف
شاعرك فيه إنعتاق الفيلسوف
والغرام اللي يشبّ الليل
ويمج الندى سكر..
نما باجفانه خوف.
آه ياوجه الصباح
جيتي مثل الفرض
يتوضأ الأقاح
والهجير…
اللي حرق وجهي هرب
حتى الملل اللي..
على غيابك
يوسوس لي تعداني وراح
آه لما .. لما
في لحظة هدوء
مرتني أسراب الرياح

___________

إرقى سماك وعِيش

خالد العلوي

أرض الصبا والطيش
‏تصحّرت من.. هم
‏( واغشي يال.. غشيش
‏من بعدهم تغ .. نم )
‏ولا أنت فكرك جيش
‏يحشر.. إذا تدهدم
‏وللجاهل التطميش
‏حد الغباء .. يرسم
‏ويبقى الكديش كديش
‏ويبقى الأخو محزم
‏بعض الحكي تخربيش
‏لا تقوله …. وتندم
‏إرقى سماك وعِيش
‏وللهم خلِ الهم
‏خلها على الله وعيش
‏وإفرح .. ولا .. تهتم
‏ما يسووو التطنيش
‏ولايرتقو و .. تسلم
‏من يوم سووو ريش
‏خانوك تذكر .. هم ؟!
‏خلهم كذا .. شيش بيش
‏تاريخهم يخ خ . . تم !!
‏في رأسهم.. تع .. شيش
‏وفي قلبهم .. مر.. دم
‏بالمال وال..بخ .. شيش
‏تمشي مبادئ.. هم

_______________

نبضة عصب

راشد الضاحي

أهلاً جميع أحزاني المتفانيه
على العنا قبل السعه وعلى التعب
هذا أنا وهذي ضلوعي الوانيه
من وين ما يممّ هواكم له حدب
الصبر كأس وآهتي له غانيه
كل ما يكمّلْه التعب اهْيَ تصب
والدمع دخّان الضلوع الآنيه
والهم جمر وزفرة أنفاسي لهب
لو بان دمعي للملا علانيه
أشفقهم اللي قال دمعاته كذب
صرخت في نفسي لنفسي الحانيه
وما أغنى عن قلبي بكاه وما سكب
حتى اصْرَخَت…. تصدّعت أركانيه
تبّت يدين الهم في صدري و تَب
أنا أدري الدنيا سويعه فانيه
وأنّ العمر أبليس وأحزانه شهب
والأرض لو هي بين بير وسانيه
تشحت تبي قطرة من يدين السحب
لكّن من يسقي يباس أغصانيه
من قبل فأس العمر يرديها حطب
م الثانيه أبغي جزء م الثانيه
يمرني فرحي وأشوفه عن كثب
أحيااان أضمّه ..ما رحم أحيانيه
يفلت خياله من يديني وينسحب
ودّي من كفوفي بشربه هانيه
وأشلّ من عيني أذى شعرة هدب
بين الآذان وخطوتي…. سجّانيه
وبين السجود وجبهتي ظِل وشُعب
بعد أتّكالي والدعاء رُبّانيه
بحرت ف الدنيا ..أبي نبضة عصب
يا رب نفسي مؤمنه ولك عانيه
أسألك ياربي العفو يا رب يا رب
تغفر لنفسي المذنبه والجانيه
وتسخّر لسقمي من ألطافك سبب
وتجعل مقامي في القطوف الدانيه
على الهنا وعلى السعه وعلى الرحب

________________

فات الأوان

سعيد بن خميس الرحبي

وين انت يوم أزقرق من زد كل الأنام
ما شفتك ف محنتي .. إلاّ وفجأة اْختفيت
وش هي العبارة وصيغتها وفحو الكلام
وش جابك الحين وأنته من حياتي انتهيت
وش جابني فبالك اللي غاب من كم عام
ما أريدك تحط يا هذا على النار زيت
تريد تبني على أكتاف غيرك مقام
وأنت تجهل شوائب ما عمرت وبنيت
فات الآوان ومعه إقرأ عليه السلام
ما عاد لك مثل أول في حناياي بيت
نامت على راحة يدينك طيور الحمام
يوم الهوى كان في عزه وله ألف صيت
من قال إن الهوى أمسى على ما يرام
دامك تجاهلت مفهومه وعقبه اختفيت

_________

الملاك

عبدالملك الراسبي

ما قصر عمر السعاده في غلاك
وانت عينك للسعادة مختصر
في عيونك للسهر ضيم وهلاك
وفي رهافة خدك الوردي مقر
من هنا واحسب الى آخر سماك
كل قطعه فيك محتاجه شِعر
القوافي والخواطر في .. عِراك
لين ما فاز الشعر فيك وظفر
الفجر يغفى على عين الملاك
والملاك ينام ف عيون الفجر
صوتك المرهف سكب فيني حلاك
كلّ كلمة تنطق بصوتك : سحر
بسّ لو قلتي : بعد عمري فداك
هزّت الوجدان .. في لمح البصر

______________


تاريخ النشر: 11 فبراير,2018

المقالة مطبوعة من جريدة الوطن : http://alwatan.com

رابط المقالة الأصلية: http://alwatan.com/details/243276

جميع حقوق النشر محفوظة لجريدة الوطن © 2014