الإثنين 27 مايو 2019 م - ٢١ رمضان ١٤٤٠ هـ
الرئيسية / أشرعة / الأدب الشعبي

الأدب الشعبي

سكة جروح

خالد الوشاحي

حبيبة الروح ما طاح الحطب و العتاب
للحين و النار تذريني رماد و هشيم
و للحين صدري يطوقه التعب و الخراب
و للحين دمعي يواري سؤته بالعتيم
الجرح يكبر مع الأيام نزف و عذاب
ما يشفي الوقت لو طول جروح الصميم
ما ماتت الاسئلة فيني و مات الجواب
و من يومها صرت ادور بي ع خالد قديم
و أصبحت شاعر يغني للبعد و الغياب
و ف كل وادي حزن ، أنا اول اللي يهيم
ما تهت ف الأرض / لكني شبعت اغتراب
في كل منفى تلاقيني الوحيد المقيم
و فكل سكة جروح و كل درب اكتئاب
لبثت شاعر يدور عن بعضه القديم

___________

كبلت احساسي

طلال النعيمي

اشتقت لك كثر الغياب اللي تحداني وجاب ..
بوح ٍ ملا صدري قهر عيا الفكر لا يضهره
مستكثره فيني حكي يسرد معاناة الغياب
انتي مرايا هاجسي الا انتي حبره ودفتره
لا تسأليني وش بقى ما باقيٍ الا العذاب
كبدي لواها خاطري وتضايق القلب وشره
يا ريم ما ضاق الصدر من كلمةٍ فيها عتاب
انتي وصالك دنيتي والعمر قد راح اكثره
ارهقتي تفكيري وانا ما بين ترديد الجواب
كبلت احساسي ودمعي واقف بحد شعره
لا تستبيحي دمعتي ان كان تنوين الذهاب
بعض الذنوب نحدها يا بنت يم المغفره
ثورتلك فكري حزن لين اشتوا قلبي وذاب
حتى قتل معه الحكاوي والمشاعر تعذره
من حس بالفرقا وطن واتقن فنون الاغتراب
ابغي يوردلي عذر يحمي الهجر واتشكره
علقت بك ذيك الهجاوي لين شفت الاقتراب
قد قادني لك اشتياق و جرني في محجره
وش حيلة الضامي وامال الوصل لال وسراب
وانتي بعينه جنة الفردوس وانتي المقبره
اما اجيك وحلمي الوردي يوصلني السحاب
والا أصد..ورجعت المحروم تذبح منحره

_______________

غنئ الظلام

سليّم بن سعيد العلوي

غنى الظلام وفارقتني لحونك!
تعال صب الشوق وسط المحاني…
طفلٍ رسى حلمه بشاطي ظنونك!
الضيق موجه والمشاعر مواني…
تشهق عروق القلب لامن طرونك!
تزفر غلا واحساس راقي واماني…
والصبر ضيع وجهته من فتونك
كانه المتيم في هواك ويعاني…
والليل وانفاسي غدو يخطبونك!
وتراقصت من حزني در المعاني…
أصدق حكي يلي تبوحه عيونك!
منها يطير العقل باحساس ثاني…
تتمرجح أشواقي بشوفة مزونك!
تروي ضمى قلبي محبه واغاني..
تزبر رياح العشق من دون كونك!
وأبقى رفيع الذوق عالي مكاني …

_________________

بعد الخطأ ..

أحمد سليمان المقبالي

لجلك حشمّت العذر ويطيح الحطب
عشان نحفظ حبنا حفظ العيون
مني السبب والاّ ترى منك السبب
بعد الخطأ كل الاوادم يهتدون
مليت من كثر التغلي والعتب
وعذالنا ف كل الزوايا يناظرون
وش فادة الزعله على ادنى سبب
غير الجفا والصد وتخيب الظنون
تعال اكسر صمتي الموحش غصب
انا سجين الصمت والصدر الحنون
تعال سولف لو سوالفنا كذب
صوتك غناوي فيه من كل اللحون
انته المطر اللي يبشر بالخصب
يتهرق احساسك من كنوف المزون
لامن على أرض المحبة قد سكب
بعد الجداب الوصل خلاها فتون
محلا العيون الناعسة أم الهدب
ترمي لواحظها من اطراف الجفون
ومبسم من التوت وعناقيد العنب
إيحدني ع الطيش ودروب الجنون
ودام المحبه طهر ماقلّت ادب
ماكل من يعشق فهالعالم يصون
عن كل ماضي قلت لك طاح الحطب
لاعاد تبطي في الوصل مهما يكون

________________

يا رب …

أحمد المعمري (الحميدي)

الله خلق آدم / ومنّه ..!! تفرّع
نسل الخلايق لين يوم القيامة
احدٍ دعى ربه وأحدٍ تضرّع
و احدٍ عصاه ولا تبع له كلامة
احدٍ بما تكرم يمينه تبرّع
واحدٍ يمينه ما تَعْرّف الشهامة
ومن خشعت البارود خرّ وتخرّع
ولا له على درب المراجل علامة
هذا عن الفزعات معزول برّع
لا يحمل الطايح ولا شلْ هامة
وليا طلبته شي / قام وتجرّع
وغيره يموت ولا تموت الكرامة
يآخووي حكم عقلك ولا تسرّع
كثر التسرّع ف المواقف ندامة
مرّكبْك في بحر الثمانين شرّع
يا رب نطلبك الأجر والسلامة

إلى الأعلى