الخميس 19 سبتمبر 2019 م - ١٩ محرم ١٤٤١ هـ
الرئيسية / أشرعة / الأدب الشعبي

الأدب الشعبي

جنّتي بيدك

راشد الشعبني

تبين الصدق بأن الشعر هذا ما هو بس شعري
انا أضعف من اني أعتذر لك في سطور كتاب
تبين الصدق بأن العمر هذا ماهو ب عمري
سنيني كلها رهن الغياب و رهن للأصحاب
انا من يوم جيتك صارخٍ مغلوب في أمري
عطيتيني مدى ما به حدود بعطفك المنساب
إلين انّي كبرت بعمري وشدّيت من ازري
وغرتني جناحيني وطرت آلآحق الاسباب
انا لك جيت ل أبواب الرضا مستاء من وزري
ولو اني قسيت ادري امون ولا عليّ عتاب
تجرّدت الأنا .. كاسر غروري.. ناكرٍ كِبري
واجيك بكل قلبٍ نابضٍ وبكل قلبٍ غاب
انا لك تسعة اخوان إجتمعنا في قفص صدري
عصرت قلوبهم لين امتلى صدري حنين أحباب
وانا اخوي الغريق اللي رحلت وجيت من قبري
وش اللي يوصف اشواقي كثر عشرين عام غياب!
انا ما هو انا لولا وجودك يا بعد قدري
اكون أقرب إلى تراب البراري او اكون هضاب
أجي لك منتحل صورة ابوي وقلبه الصخري
وانتي لو تنادين الصخر،، من زود عطفك ذاب
أجيك بكل حاجه تعشقك من حيث لا تدري
أجيك ف قهوتك في ‘انسولينك’ في’صباح الشاب’
أجي وحدي… على باب الرضا في ضعفي المزري
أجيك اللي اجيك.. اهم شي ما ينغلق لي باب
يا امي.. جنّتي بيدك.. ولو كان الشعر شعري
انا أضعف من اني اعتذر لك في سطور كتاب!

__________
سما أولوياتي

سعيد بن خميس الرحبي

بنيت لك في دهاليز المشاعر جيوب
ولك سما أولوياتي وطن وأفرعة
مرّي بها الحال واختالي غزالٍ لعوب
وعيشي غرامه بما يهوى قليبك معه
أنا من عيونك الخجلا أمووت وأذووب
يا كيف لو سهم عينك مر من يمنعه
ومحلاه وجهك إذا هو يمتلي بالشحوب
تظهر تجاعيد رسم وصورةٍ مبدعة
لا ترسلي سهم عينك لاصطياد القلوب
قلبي رهيف الشعور ونظرتك تردعه
نسنس شمال المحبة مع نسيم الجنوب
وغنّت عصافير أشواقي وطابت معه
محتاج لك كل ما مال المساء للغرووب
محتاج لك من ضفاف وأنهر وأشرعة

______________________

عمياء الكتب

أحمد المعمري ـ فلك

بعض الكتب في طيها تحمل اسرار
عمياء لو المضمون مضمون عاري
وبعض الكتب ما ؤلفت غير للنار!
لو صدرها زخُرف بعنوان ناري
وانا على ضيم المسافات صبار
يقطع خيالي مجدبات الصحاري
كنا على درب المحبين سنيار
واليوم نشكي من هجوم الضواري
والذيب لو يقضي نهاره وسط غار
تالي الليال يعيش حالة طواري
عشتار وين انتي من الليل عشتار
يا سيدة كل الحسان العذاري
في غيبتك مغليك عشاق الاسفار
ما قد سمع عن راحة البال طاري
ما لوم قلبي لو من الحب منهار
ولا الوم عيني لو بكت ف انتحاري!
بعض المشاعر ذروة اليل تختار
والشعر لا شعري ولا هو اختياري
يبقى القلم للطرس هو ابنه البار
وتبقى القريحه نهر والنهر جاري
مثل العفيف اللي لبس ثوب الاطهار
ولا يبطل النيه عمود السواري
ثلث الوفى يخرج مع الحب اجهار
وثلثينه في جوف التراب متواري
وبرج الحمل لا صار بيدين جزار
اكبر طموحاته ينال المصاري
على فراقه يقرعو الفتيه الطار
وليلة وفاته يرقصن الجواري
بعض الكتب عشعش على رفها غبار
عمياء لو المضمون مضمون عاري

____________

أمي

عبدالله البريكي

أمي ملاذ الدفا هي منبع العفه
أطهر قدم داست الأرض وهنا كافي
أمي شربت العطا من نبعها نفه
منها القليل العظيم الوافر الوافي
كم بت امر العمر من ضفه لضفه
ظل الشجر والنهر من عذبه الصافي
حتى الرمل كم بكيت ومد لي كفه
ماعوضتني أبد عن حضنها الدافي
سطر وفاي القصيد وقام اخذ شفه
مني .. أنا اللي أحبك تشهد اطرافي
البوح انا ياشعر وف القدر وفه
خوف احترق من كلام ن ضمه الخافي
البوح أخذ صورتي لك من على رفه
قام ومسح عنها غبار وصدح قافي
البوح انا ماخبرته يظهر بخفه
جبته لجل خاطر عيونك عسى شافي
شيخة حريم وذهب تاج ن لمع عفه
بنت الذي ضمني في بشته الضافي

___________

هل الدمع

خليفة بن طويرش

هل الدمع غيمه سكايب
سوى بحور من بكاه
بحر الهوى كله مصايب
مابه أمان ولا نجاه
جيته أنا م الحب طايب
قفى ي ناس ولا رضاه
في ذمته حق وطلايب
يا ما طمر ناس بماه
وين الأهل وين الحبايب
قلبي شكى ماحد عطاه
اليوم عاده الراس شايب
والحال شاكي من وزاه
ما فادني طب وطبايب
حرز المطوع مع دواه
غلطان لي جافا القرايب
حتى ولو كانوا شقاه
هم محزمك وقت المصايب
حسبي على راعي الوشاه
هل الدمع غيمه سكايب
سوى بحور من بكاه

_____________

حلم العمر

ناصر العلوي

حلم العمر جافاني بالواقع وحتى بالمنام
يتقفى اثري بخطوتي يعثرني كل ما اسلكه
من يومها ظلال الفرح ما نوخت بارضي خيام
كني عدوها وقربها بارضي مصيبه ومهلكه
ودي تحالف كالحزم لكن ابي أمن وسلام
ما ودي امشي بالجرم وعرض الخلايق اهتكه
ودي مخاييل الفرح تمطر بأرضي كل عام
وتنبت فيافي مخضرة وثمارها اتملكه
من محل اضمى خافقي واروى عروقي بالسهام
من خصبها ضنك الخصب وديانها متهالكه
أواه وش هي حيلتي لو غارت جيوش السقام
وارمتني بسهام الغدر مسلم وهي المشركه
اتعبتني يا هالزمن لكن ما ارضى الانهزام
باسي قوي وعزمي قوي لو طولت هالمعركه
وان كانت افراحي اختفت ولا عاودلتلي بالمنام
بكرا على الواقع بعد إذن الملك لي مملكه

إلى الأعلى