الثلاثاء 20 نوفمبر 2018 م - ١٢ ربيع الاول ١٤٤٠ هـ
الرئيسية / أشرعة / الأدب الشعبي

الأدب الشعبي

فقدتك

محمد بن مبارك البريكي

فقدتك والبقا راسي وجيتيني حلم ف قبور
تخيل كيف انا اصلي على التابوت ف ترابي
بعد ما انتي تركتيني دمع عيني غدا طابور
مسحت الاولي لكن بقى غيره على ثيابي
تصور لو يجي طيفك مرة بس علي ويزور
قبل لا استقبله يوقف ..يدق من الحيا بابي
تعال وشوفني عقبك فقير بلا قلب وشعور
تعال وخلها عيوني تصك بشوفك اهدابي
انا لاجيت ابكتب لك غلاف الذاكرة مشتور
بقت لي صفحة الفهرس عسى القاك ف كتابي
يناديني الصبح وينك ترى غيمة شتاك تدور
وانا طيفي يغطيه الظلام بشمس جلبابي
كثرما احتاجلك انتي جيتيني ظلام ونور
وكثر ما اشتاقلك انسى بأنك اول أحبابي
نعم ياغيمة اشواقي تمريني وأنا المقهور
وضميتك لين ما بلل نفافك ريش اسرابي
تحمل وصبر غيابك لأنك بالصبر مأجور
انا مثلك كسير غياب من اللي يجبر غيابي
تدور فيني اسألتك جواب لك يجي معذور
خفوقي لو يسامحني أكيد بتعرف اسبابي
لانك موطن احساسي واسمك داخلي محفور
ولانك حب دونته وصليته في محرابي
فقدتك والعزى فيني يكتب حزني المأسور
وطيفك فيني ودعته خيالٍ داخل ترابي

______________

يطيح صوتي

عبدالعزيز السعدي

يطيح صوتي ويموت ويختنق صدري
من ناشف الريق لين أحجار عثراته
ابعتذر يا ( … ) لو طحت من قدري
السالفة عمر يا عمري بغلطاته
يخذلني الشعر كالعادة و من بدري
من قبل اقرأ واكتب في مسافاته
البحر يدري وشارعنا بعد يدري
وعيونك الزرق والمقهى و كأساته
وأربع جهاتي ومن فوقي ومن حدري
بانه رفضني كثير و جر خطواته
ابعتذر لو طعنت الغدر في غدري
وابعتذر لووفاي تقوم راياته
حبيبتي صوتي الهارب إلى صدري
إلى متى ينتحر من عضة شفاته


باب الامل

خليفه الصائغ

مرت على باب الامل تشبه الذوق
متكشخه ، روعة جمال ولطافه
واحساسها صاير كذا يطلع لفوق
عالي فـ منسوبه وزايد ثقافه
شروات عود الخام في حزت ريوق
اول صباح بـ كوب شاي الضيافه
يسمو الى القمه وله عطر مرموق
ويصاحب الهندام بازكى نفافه
واما انا موجود في شرفة الشوق
اتنفس الاعجاب وازرع ضفافه
وإذا انبتت اشعار افكارها عذوق
اقطف لها فكرة عشق لا كلافه
حتى الجمال فـ شكلها جاب منطوق:
لا اشتكي سمنه ولا بي نحافه
مرت .. على باب الامل كلها ذوق
متكشخه .. كلها جمال ولطافه

____________

غايب
محمد الوحشي

غايب ونار الهجر هاليوم منطفه
يامبطي الشوف وانته عندنا المغنم
لا تقول مزن الغزل والشوق وش دفّه
دفّه قبالك وهو من دفته يرزم
يلي حياييك منحفّه بلا حفه
ادقاق كن اللضى من قوسها تضرم
وتسلهم بعينك الشهلا واترفه
وحراس عينك تظلل وانته تسلهم
وخنجر يمانيك متورد على عكفه
حدّه يقص القراين هوب متثلم
وتلد فيّه وتتبسم من اللهفه
يا عجبت الله كيف التوت يتبسم
حبيبتي والدوا بعينيج والشفه
أنا فدا العين وانا فدوة المبسم
العالم بكف وانتي روحج بكٰفه
ولا غالي عنج الا كل من يعلم
اذا انظرتج العروس ان كان منزفه
تغشى بفرحٰها وتتنبه وتتبلم
خذيتي الحسن ما بقّيتي النفه
اللي تنف الصبايا وفيه تتحلم

_________________

لي حكاية

خليفة بن طويرش السعيدي

لي حكاية في كتابي من حكايا الاولين
كان بلقى لي مسامع بسرد القصة سراد
عطني من وقتك دقايق حتى لو وقتك ثمين
يمكن أنه في كتابي شيء من بعض الرشاد
بين جنه ونار أنا شفت الفتى يبكي حزين
ما درى عن حرب نفسه أقوى أنواع الجهاد
الله وصى في كتابه كيف بر الوالدين
كيف أوصي في عضيدك دامه للبندق زناد
ولد عمك لا تعادي حتى لو فعله يشين
نار قالوا ما تخلف بعدها إلا الرماد
شوف جارك قبل دارك يالخوي خلك فطين
احفظه ساعة غيابه هو عضيدك بالوكاد
في صلاتك لا تهاون تحفظك دنيا ودين
ذي فرضها لك الهي قمتها قمت العماد
الله يجزيك بصيامك دام ربي لك معين
والزكاة اليوم أدي تنفعك وقت الحصاد
شائت الأقدار ترمي صوبت مني الوتين
يوم قلبي كان شاهد كنت في صف الحياد
ذيب يعوي في فلاه وقالوا الصيد السمين
ما دروا مغبون حاله يشتكي جور العباد
صار حالي مثل حال ابن الملوح من سنين
صرت هايم في صحاري صابني هم وسهاد
له طلاسم حرز قامه بالغزالي يستعين
حي قلب لي تشافى بالمحو خط المداد
هذا بيت الطين تلقى فيه حفنه من طحين
الله أكبر ذي سيوفي حربهم تبغي عتاد
الفسل إن طاب أصله في ثماره هوه يبين
والنخل إن مال عوده قلعه بعد الجداد
سمح الله دروب شخص كان عندي شيء ثمين
يوم يطلع مثل طلع الشمس نورها لبلاد
راعبي ناح وترك حالي بعد صوته حزين
شاقني شوق اللملبي وسط بيته بإجتهاد
شوق من صلى صلاته خاشع ويرفع يدين
يطلب الجنات داره يلهمه درب السداد
زرفلت نوق المفارق بالعجل هم راحلين
هانت العشره عليهم صارت العيشة نكاد
إنتهى سرد الحكايه وين راحوا الطيبين
يحسن الله في عزايا نكس أعلام الحداد
————-

وقت الشروق
حميد السعدي

وقت الشروق و حان يا طالب الخير
ودي بكاس الشاي من لمسة ايديك
في ذا الصباح اللي جبرني على السير
اجري وراء عيونك وأنادي انا ابغيك
متسيد بحسنك ومن حسنك تطير
عالي سما الحلوين ولا حد يبليك
فيك الحسن ايه وفارق عن الغير
وجهك حلو وهذا عن الناس يغنيك
تمشي واذا تمشي ترى غيرك يغير
حتى يقلد مشيتك او يماشيك
وانت الدلع زايد بطبعك ولا ضير
لكن خلق لك عاذل ومن يعاديك
مفروض تكتب للبشر كل تحذير
لأنك خطر من زينك اللي محليك
يا سيد الحلوين سرك ترى ف بير
خلنا نعيش العمر ايدي مع يديك
نحرق قلوب الناس طير/ن مع طير
ونحلق اعلى هالسما لي حواليك

إلى الأعلى