السبت 21 يناير 2017 م - ٢٢ ربيع الثانيI ١٤٣٨ هـ
الرئيسية / أشرعة / الأدب الشعبي

الأدب الشعبي

وجه الحزن

الحزن طعم المسافة وانكسار الذات لحظه
الحزن قوت الفقارى للأماني الموجعة
الحزن لاصار ما يبي له غير ومضه
يحتضن عمرك فراغ ويستبيح الأمتعة
الحزن كذبة زمان ردده بعضه لبعضه
غافل أفراحه وصدق إن به من يسمعه
دام تابوت المشاعر خاوي والحلم قبضه
ليه ترضى العمر كله تعيش وانته امعه
من عليه تحزن حقيقة أو خيال يبين رفضه
العمر يطوي بساطه وأنت وسط المعمعة
باكر وباكر تأخر والحزن في كل غمضه
بين أمس وبين باكر عزم يومك ادفعه
خل حصن اليأس ينسى حارسه ويخون أرضه
تنثني كل الشوارع للمسافر أذرعه
للاماني والسعادة والأمل والحب لحظه
والحزن طفل تربى خلف ذيك الأقنعة

خالد العلوي

________

ليل وغياب

قلبي المكسور من ليلة غيابك
ما بقى لليل من بعدك كلام
أذكر اني جيت .. قلت الله جابك
مسكنك عيني وصدري لك غمام
ضاعت الأحلام وتناثر ترابك
واستضاق الوعد من كثر الخصام !
ميتٍ هالصدر من فرقى سحابك
ﻻ زهر دونك وﻻ شوق و وئام !
الوصال اللي تشكل في سرابك
ﻻ تبعته طاح في عيني ظلام
كنت اشوف الصبح تطريزة ثيابك
و المساء في ناعس عيونك ينام
أسألك بالله لاْ تْرزين نابك
الطعن يا بنت في الميت حرام
ما رجيتك بس ردي لي صوابك
لو اهي مره ، على صدري وسام !
الحكي يكثر وأنتي في أغترابك
وانا مليّت اعذرك وسط الزحام
كان هذا البعد حلقه فوق بابك
أرجمي حلقتْك يالله بالسلام

إدريس الهنائي
_________

رحيل وذكريات وجرح

وتسألني : وش احوالك؟ وانا الموجوع في نزفي
وانا اللي يصطنع ضحكه يغلفها بكثير اسرار
تريدي تعرفي احوالي؟ انا اللي واصلن حتفي
غدر فيها الفرح مره طعن ظهره وبعدها طار
بسلامة عمرك ادعيلي انا باقي هنا مطفي
بقى عن اربعيناتي كذا خطوة وبعض امتار
اعايشها وانا وْهمي الكبير العاصي المخفي
ويقضي حفلها وجعي واعطي للغياب اعذار
واشعل من ثقاب الآه شمع بليلتي واغفي
على حزنٍ عزف نايه معه جرح العمر تذكار
جروح كثار تزهمني وحنين ما رضى يقفي
ولكن قسوة الدنيا ولعنة حظ في اذار
يعيش بدنيتك غيري واعيش بداخلي اوفي
واسدد سلفة احلام الزمان البايق الغدار
وانا اللي كنت احلم بك تكوني بالعمر نصفي
رحل كلي مع ايامك عصف فيني الزمان وجار
احبك لوتساومني السنين الروح لك توفي
احبك نبض في قلبي اموت وهالغلا بك بار

محمد الهنائي

________

شمس الاُمنيات

من فتيل الشمس صبح ٍ يِشْتعل
يِشْبهك لـمّـا تـشـبْ الاُمـنـيـات
حِين شفت الليـل بطْرافه ذبـل
ماذِكرت -إلاّ- جبينك والحياة!
كنت مثل الحلم لامنّه.. رحـل
تارك ٍ ليله وسط عيني يِبات
كان همّك هَـمْ، وغيابك جبـل
كاسر ٍ ظهري واكابر بالثبات!
أنْتظر والشوق لـلِّـقـيـا عَجـل
يحْتريك بْروح تسْألك النجاة
الحياه دروب واحلام وأمـل
وانْت حلم ٍ يِختصر كِل الجهات
اشرق بْعيني -أمانة- واكْتمـل
في دِجى صدر ٍ غدا عقبك شتات
شوف وجه الصبح في وجهي ذبل
يعْتريني الضيـق والظلمى عباة!
لا تـخـلّـيـني بـلا نـاس وشـمـل
ياغـنـا عـمـري ترى مالي غناة
من فتيـل (الحُب) دنيـا تِشْتعـل
وانْت.لي دنيا بكتْهـا الاُمنيات
شبْ نار الشوق واشْعلني وصل
كيف اعيشك روح وفْراقك ممات!

سعد السعيدي

_________

فريد الحسن

إذا شفت القمر طالع حبيبي أرجوك لا تطلع
ما نقدر على قمرين وليل العشق يصير نهار
وأخاف إن القمر لما يشوفك يالغلا يطمع
أكيد إنه بعد شوفك ، يشوفك أحلى منه يغار
تأكد يا قمر كوني جمالك أروع وأروع
وأخاف أكثر إذا شافك بعد عمري القمر ينهار
ألا يا روعة الدنيا جمالك للحسن مطلع
رحيق الورد من شفك وعينك مكمن الأسرار
عسل كلك على بعضك وثغرك للعسل منبع
حبيبي قول وش خليت جمال وحسن للأزهار
ألا ما أروعك كلك وربي ميزك بأجمع
جمال وحسن في هالكون يخلي الكل بك يحتار
كأن الحسن لك وحدك وكل الوصف ما ينفع
أيا سبحان من سواك ألا يا محيّر الشعار
فريد الحسن في ذاتك ، وربي ، للحسن مرتع
خفيفة دم مع طيبة وغنج وعين كالبتار
سدلت الليل بأكتافك ونور الصبح بك شعشع
يهل العيد بجبينك تطول بروحك الأسفار
وحق اللي خلق حسنك وكل الحسن بك أودع
ترفق بالقمر دخلك ولا تخليه منك يغار
وإذا شفت القمر طالع حبيبي أرجوك لا تطلع
ما نقدر على قمرين وليل العشق يصير نهار

عباس بن عمبر المسكري

إلى الأعلى