الثلاثاء 18 سبتمبر 2018 م - ٨ محرم ١٤٤٠ هـ
الرئيسية / أشرعة / الأدب الشعبي

الأدب الشعبي

بلا ميعاد

ناظم البريدعي

بلا ميعاد ياخذني الهوى يا صاحبي وش عاد
اذا نسمة عطر مرّت شَـعوري وانـتـشت فـكرة
من اللي شلّت فْـوادي ، وانا شاعر أهيم فْـ واد
رهيف احساس ، متقلّب مزاج آحبّ من نظرة
هنوفٍ مرّت بْـ بقربي ، و كانـت للشعر ميلاد
و كانت موت ، لو لا لطف ربّـي وقتها وْ سترة
أيــا سبحان خالقها ، بنـيّـة من حلاهـا تْـكـاد
تكون اوّل بشر من نور يضوي العالم بْـ طهره
وأيــا سبحان من جمّع بها الأشباه والأضداد
عليها مْـن الحيا سترة ، و فيها مْن الحلا بطرة
شبيهة خيل تتبختر ، خطاويها خطاوي جْـياد
لذا وش حيلة الشاعر إذا طاح بْـ هوى مهرة
كثر ما حاول استثقل أحس اني لها منقاد
و احس اني عجز بيتٍ لقى بعيونها صدره
ي ربّ الحسْن كيف الحسْن يتهاطل من الاجساد
ي ربّ الورد كيف الورد قـام بـ خدها فطرة
سلامي كلّ ما تضحك و تشرق من ثغرها اْعــياد
على اللي بْـ وجهها يناظر و خاز الضيق من صدره
غدير شْـفاهها يـروي ضماي وْ كـلّ ما أرتـاد
أصدّق مـن يقـول ان الـمطر فـبْـدايته قطرة
واصدّق كيف ما اصدّق وانا اللي ما هنا لي رْقاد
على ابْـواب الفجر واقف عساها تْـمرني بكرة
بلا ميعاد ،، من قال العشق يحتاج له ميعاد !؟
أنـا أقـرب مثل يا صـاحـبـي حـبّـيت من نظرة

__________
أحلامي العمياء

سالم بن مهزع العلوي

تنفش بصدري ضيقة العالم وترعاني هدر
وانته تزملني الهجوس وتبسط ضلوعي مزار
أسرْها في نفسي وأبدي لسقطاتك عذر
لو ان عذرك مثل عجل القوم وظنوني خوار
يا سارق صواع الفكر يكفيك مكيال الوزر
ان كان باقي في ضميرك شيٍ لحسن الجوار
من علمك تنحر نياق العشره بكف الغدر
من أمْلك بعد الظليمه تسكن احضان الوقار
في عصمة الغايب قضت احلامي العذرا عمر
وهبت لك باقي سنين الجدب مغزاي العمار
وان كان باقي لي على صفحاتي شوية قدر
خذني على كف الرجا ما دامت الساحه دمار
ياللي تراودني على بيعة أحاسيسي عصر
توْه مساء الضيق مقبل ما سدل باقي الستار
لو يستبق باب الهجوس الحرف ما قدْ الستر
باقي على طرف الزوايا علم ما طاله نهار
وان اشرقت شمس المعاني وزاورت جب الصدر
تسعفني الحنكه وتقرضني على ذات اليسار
من عادت حروفي تغامربي وترميني بحر
ما كنها إلا تمارس الميسر وتدريبه قمار
لين ألفظ أنفاس الصراع وتبدل الضيقة عشر
وتجرني لأقرب مواني الهم لحظات احتضار
كني مساهم بين بطن الحوت أو بطن القبر
يا وجهة الحربه عسى ما توقعي نفس المسار
تجنبيني لين يثمر عود يقطيني يسر
سقيم عود الحظ والعثره على طين القرار
أحلامي العميا تعيش الواقع بحسب الذكر
تستلهم الطرقه من اللي( ما يقال وما يثار)
من يعبر الرؤيا سجين وبيني وبينه نهر
مدري استخار السجن عن فتنه أو السجن انتصار!

_____________

ودعتك الله

أحمد بن خلفان الصلتي

ودعتك الله واستودعتك أحلامي
والسر محفوظ بين الروح خبيته
منساك يامن طوّتك يد الايامي
يا من عشانه حبل الأفكار مديته
تربع اسمه معي من زد الآسامي
النور والشمس والاقمار سميته
من روحي أغلى ومن نفحات الانسامي
عيني وقلبي وروحي كلها بيته
ما طوّل السعد مر مرور الاكرامي
ياليت لو طال وقته وضل يا ليته
ظامي فؤاد المعنى للهوى ظامي
يحس مثلي وم لاقاه لاقيته
الهم والبخت أعدائي وظلامي
درب الهوى طوّفه قلبي وعديته
ابيك تمسح على آثار الاقدامي
ما عاد بالدرب ما يفرح إذا جيته
اعيش في واقعي أو عشت فوهامي
صعب اقطع الحبل ياللي لجلك رخيته
إن كان نور القمر ضمته الاكوامي
باب الامل م انغلق لا تقول سديته

________________

فرحتي تاهت
سعود الشيذاني

ويل حالي ياحبيبي من عيونك
لافرقهم ناظري تذبل زهور
فرحتي تاهت وماتت في لحونك
يوم رحتي يالغلا راح السرور
يا غناتي صرت ما أصبر بدونك
ضاق صدري من فراقك يالبدور
يا حلاتك يا جمالك يا فنونك
من حلاتك جبت انا هذا الشعور
ليتني مسجون دايم في سجونك
طول عمري يالغلا طول الدهور
لنّي أحبك حب دايم في غصونك
مستحيل أنساك لو رحتي شهور

_____________

وين القناديل ؟
ماجد بن حمد المقبالي

يـــا ساهرين الليل وين القناديل
في ليلكم ما شفت شي و هداني
حاولت أسـلـي خاطري بالمواويل
لكن على يا ليت وقف لساني
يا ليت باقي حيل وأشد بـ الحيل
والحظ يجمعنـي معه لـو ثوانـي
البحر هايج والسما تدفق السيل
والمركـب يدوّر رصيـف الموانـي
لا تسألوني عن بقايا التفاصيل
ما ظل واحد ما سمعني و قراني
أعسف هموم الأمس وألقى المقابيل
ترسم على باب الأمـل هم ثاني
صدمات وقتي ذوقت قلبي الويل
أسمع صداها في ضلوع المحاني
تعبت أمشيهـا مجامـل و تمثيـل
تعبت أكابر فـي حياتـي وأعاني
ما سدت دموع المحاجر مناديل
وما ردت المقفي (دخيلك عشاني)
أسقيه من فيض المشاعر هماليل
وآنا ضميت أحساس ليته سقاني
يا ليل لا تقسى على القلب يا ليل
جاني من هموم الزمن ما كفاني
كل ما أقول تصير بكرا تساهيل
تتبعثر ف عيني جميع الأماني

إلى الأعلى