الأربعاء 26 يوليو 2017 م - ٢ ذي القعدة ١٤٣٨ هـ
الرئيسية / أشرعة / الأدب الشعبي

الأدب الشعبي

في غيابك

في غيابك
مافقدت الاعتابك
ماجحدني الا انا
ومافقدت الا صوابك
في غيابك
صارت أيامي تشابه
مثل عمري
مثل حلمي
كن هذا الليل انتي
وكن نور الشمس بابك
في غيابك
مابقى الا العطر ساكن
حس وانفاس الأماكن
يورق أحساسي قصيدة
وتمطر ف غفلة سحابك
في غيابك
صارت أحلامي شوارع
تعجن اللهفه بترابك
ذكرياتك
أمنياتك
متخمه بإحساس جايع
تجمع وتنسى حسابك
في غيابك
أشتهي لحظه وأغفى
من عذابك
كنت أرض وكنت منفى
وصرت راضي بإغترابك
في غيابك
صبح وجهك
ليل كحلك
شاعرك ماعاد بيده
فيك يستجدي قصيده
ويخذله حرفه خطا/بك
في غيابك
صارت عيوني نخيل
شاخصه بوح وهديل
مر واشعلني مسافه
واحطب ضلوعي فتيل
في غيابك
ها أنا الحي القتيل
في غيابك

خالد العلوي

جرح وغياب

اعذريني
راحل بحزني
لحزني
وكل جرحٍ
يحتويني

ويكفي اني ما اخونك
عشق وافي
حتى بحلامي
اصونك
وعلميني
كيف خنتي؟؟

شاعرٍ ينزف مشاعر
حافرك بضلوع صدره
يملي احساسه محابر
لدفاتر فالشوارع
فالمقاهي
في حديث الليل
لو صمته يكابر
اعذريني

اعذريني مابقى مع صمتك العابث نسم
اختنق في صدر احلامه معك كل الكلام
وانتي صدقك كذب وعودك تلافيق ووهم
والصبر حبله ترخا قولي ع الحب السلام

واعذريني
بحمل ايامي وسافر
للبعييد
للالم للجرح
لكن لا جديد
كل يوم اوجاع في صدري تدور
ومن رحات الهم تذريني الرياح
من عرفتك وانتي ماعندك شعور
ومن سكنتي العمر اهديك السماح
ولك زرعت القلب في ارضك زهور
ولي غزلتي حزن في صدري وشاح
وكم بنيت الوصل من اجلك جسور
وانتي تهديني من ايامك جراح

واعذريني
ما بقى لجلك
سماح
كيف اسامح

والعجاف بكل ذكراها تصافح
هالجفاف اللي سنيني تحتويها
لو لمست الغيم لايمكن اسامح
قسوتي ناتج مشاعر تذكريها
كم حزني غير/منك الكيل طافح
والسنين العوج لله اشتكيها

و لو عشقتك
في حياتي
فالكرامه
وعنفواني
استوي انسان اخر
ولا اساوم
في شموخي
اترك الدنيا
واغادر

محمد الهنائي

أضحك بوجه المرايا ..

أضحك
بوجه المرايـا ..
.. لجل أشوف اني سعيد
و انعكاساتـي حزينة
تجمع دموع المدينة
في عيوني ليييين تملا

و تنهمر نهر جديــد !!
خلــف
هذا الباب طفــل
و أمنياته يــوم عيــد
و خلف هذا الطفل

قفل ..
باب قلبٍ من حديد

ينتحر عـــام جــديــد
و الشمس تصبح جليد

و أنت
لو حاولت تهرب

يتبعك لي حد وينك !!
كان يمشي فأتجاهك
كنت تمشي فأتجاهه
كنتوا في عكس الطريق
ما أسهل لقانا البعيد !!

هيثم البلوشي

للدمع حشمة

ابكي صمت من حسرتي وتألم
واحبس دموع العين بس خوانه
سالت بحرقه ف وجنتي ما ترحم
وشراجها سوت وشم بالوانه
وجروح قلبي يا عساها تلتم
لا هي سلمت لي ووهنت باركانه
انهد حيلي وطاح عود المعْلم
طاحت سياجه ولا بقت بيبانه
يا الحب جمعت القلوب وتسلم
والعشق ساس وبيت له عمدانه
مثل البيوت اللي نزفها مؤلم
بأصدق شعور ولا هنت قيفانه
عشت الحياه بحلوها والعلقم
وآخذ جرعتي زود من حرمانه
اكتب من الحسره حروفي وارسم
باخر رصيف البوح وصح لسانه
اصل الخيانه والمدامع تحشم
رمش وسقط بالعين دمعي عانه
لا تظن لو لحظه شعوري تفهم
لا تظن بعزف ع الوتر باحزانه
ادري فقدت كثير عذري مغرم
لكن كسبت اشياء من فقدانه
احطب من ضلوعي لاجل تتعلم
ان الدفاء اصل الوفاء وعنوانه
وان الحياه احلام وخلني احلم
ما دامها جذور الوهم رويانه
ما دام لي حقٍ عليك انت افهم
لا تطري ل حبي ذبول اغصانه
لا تطري ان القاع اصبح مظلم
والنور شد من الخفوق اضعانه
ولو جاز لي بعد المنام اتكلم
بقول ما تسوى وصارت دانه
بقول يا صبري عليهم تحرم
ناسٍ على باب العشق خوانه

انور الراسبي

لحظة غياب

خلي السوالف وأتركي عنك العتاب
تعالي ضميني وطفي حنيني
ليه الحكي والوصل خايف ومرتاب
لمي بقايا فرحتي وأجمعيني
كذاب أنا وستين مليون كذاب
لو قلت شوقي ما فلت من يديني
أنا السماء وأنتي جناحين وأسراب
أسافرك بالحب وتسافريني
أمد لك قلبي فضاءات ورحاب
وأسقيك لو تظمين من ماي عيني
أذوب بك وأجمدك كل ماذاب
ثلج الوصل وأحنط رضاك فيني
لحظة غيابك شرعت للحزن باب
وخطت شوارعها على وجنتيني
قسمت لك قلبي مضاديد وأحزاب
حزب يصفق لك وحزب يديني
أقسى معاذيرك كذا دون أسباب
وأجملها حطة قبلتك في جبيني
ما عاد باقي للبكاء دمع وأهداب
شقي مذارف دمعتي وأذرفيني
لا تسألي دام اللقا عمر وكتاب
صبي عسل وصلك على راحتيني
أطول مشاوير الوجع لحظة غياب
أشك لحظه فيها أنك تبيني
وأجمل مشاوير العمر لمة أحباب
لا ضمني حضنك وطفى حنيني

راشد الضاحي

*قصيدة مسافرة ..

فقير لله

( فقير لله ) خالقني ومنشيني
راضي بالاقدار دايم كيف ما تاتي
إذا حرمني ! حرمني لجل يعطيني
وإذا عطاني ! عطاني يختبر ذاتي
مرتاح جداً ويا طيبي .. ويا زيني
لا حس في همي ولا في معاناتي
نفسي عزيزه ورزقي رايح يجيني
لو إني اموت مابدل قناعاتي
ربي خلقني وربي ما يخليني ..
وأنا قويه مع ربي علاقاتي
يا رب وفقني ويا رب نجيني
واحفظ لي ابوي وامي واحفظ اخواتي

مرضي البلوي

إلى الأعلى