الخميس 19 يناير 2017 م - ٢٠ ربيع الثانيI ١٤٣٨ هـ
الرئيسية / أشرعة / الأدب الشعبي

الأدب الشعبي

أصدقائي .. كثار !!

أصدقائي .. كثار !!
وجوه مقفرة ..
شاحبة مستنكرة
ضحكة غبار
حروف مبْعثرة .. لا الكلام يبقى كلام
ولا السلام يبقى سلام
كل ما فينا بقى ..
احتضار .. اختصار
أصاقائي .. كثار
إنكسار .. إنحدار .. محرقة لصبح إخضرار
أصدقائي .. شبه طين!!
سكين!!
هم غدو جرح السنين
ومين؟!! .. لا سألت وقلت مين؟!!
أجاوب وصاروا صغار
أصدقائي .. سافروا فيني وهن
عقد من عتمة وشجن
في عروقي لين ما جفت معاليق الشعر
وتاهت خيوط الزمن!!
فاقوا في وجهي إنحدار!!
إصدقائي .. كثااااار
بمختصر جرح الكلام .. ليل يلبس إنكسار
إصدقائي .. كثااااار
ثرثرة وضحكة غبار

خميس السلطي
____________

(1)
فراغ

محتاجِ نصْف انْسانِ يَكْمل،فراغي
خارجْ حدوْد الْعرْف فيْ داخِلِ الدين
محتاجه فْ ترميم باْقي دماغي،
من بعْد ماْ مرَّت عليه الثّلاثين
فيني تجاعيد التعب لون طاغي
اِنسانِ لكن،، في نطاق الوحيدين

(2)
الوحده

الطريق طْويل والوحده بلاد،،
للأسف ما تتسع غيري بشر،،
شخص مثلي قرب عمره للنفاد
مثل قرب الصّبح لاجْفان الفجَر
إعذريني،بيت صدري من رماد
ما تعيشه روح طينتها زهر

(3)
غياب

وَحيد فْ سَراب العمْرِ يشربْ عَلى النّسياْْنْ:
غِيابكْ؛عَسى يطفيْ وَجع نصْلِك الباردْ
قَطف لكْ نَفَل صدرهْ، رَبطهاْ مِن الشّرياْنْ
لَجِل لوْ رَحل عنّكْ تِكونيْ خَبر ساردْ:
رَبيع الْجروح السّاْرِيه لاخِرِ الوجداْنْ
يِبس وصْلِكِ وإنتيْ عَلى ظلّهِ الشّاردْ
حَنينهْ بَحر لكنْ تَخلّىْ عَنِ الشطآْنْ
لأن الأَمل في رجْعِتِك ماْ إِله واردْ
بِعِيدهْ عنِ الموعدْ،قِريبهْ مِنِ الأجفاْنْ
يَليت الْبَخَت فِ يْديْ مِثل دلّّة الماردْ

صالح الحاتمي

__________

(باكر)

وينك؟!..أنا محتاج قربك رجيتك
يـا مبْـتَـعد لبْـعيد عني و تقْـفى
باكر يَـمرّوا بي عـلى بـاب بيـتك
وتْـصيح فيك الناس ناظم توفّـى
ما ينْـفَـعك دمْعك ولا قولْ ليـتك
وفّـر أكاذيب الحزن فيك تكْـفى
بالأمْـس كلّي نـزْف مجروح جيـتك
ماكان ردّك غـير باكر بَ تشْـفى
عكّـرْت نـهْـر الحب وافي سَـقيتك
جاتك مَزوني وارتمى الغيث يصفى
خـيّـبْت ظنّي يوم جيت وْ نَـخيـتك
واذْكر ضَـياعك فالبحر دون مرفى
غرقان جيـتك حوت فيـني حَـميتك
شلتك وَ حولك كمّ أخشاب تطْـفى
شفـتك تَـعاتب غربتك واحْـتَـويتك
لكن تَـجازيني قَـساوة وَ تجْـفى
انسان ضايع في دَروبي لَـقيتك
ما لك سَـوى حضْـني يضّمك وَ تدفى
لجْـلك حَـياتي بعْـت رخْـص وْ شَريتك
في ظاهَـري افْـراح والضْـيق يخْـفى
واليوم وسط القبر حسرة بكيتك
وانته عَـيونك بالهَـنا دوم تغْـفى
اهْـديـتَـني موتي وَ عمْـري هَـديتك
شكراً عَـلى موتي إذا الْـقبْـر منفى

ناظم البريدعي
___________

بن بارد

ودي اتصور صباحي دون صوتك!..
وش يصير؟!
خبريني من الاخير؟
تحسبين تزيد دقات الوجع؟
او اكون بلا شعور
وانا من يملك تفاصيل الامور
ولكن..
وش يصير..؟
ل اعندم صوتك ترى الدنيا فضا
او بالاحرى ﻻدموع ولا ضحك
كوب بارد دون بن ولاغضى
بس من الداخل حزين.ن.مرتبك
بارك الله في الحضور وبالرضا
لي بزغ خيط النهار بيكتبك
ابتدي اول صباح
دون ماء
دون ارض
دون صوتك..
ياهي لحظه من سواد
بين ظل وطاوله
تنرسم كل الملامح
مافي اصلا شي واضح!
الا اني صرت اعمى
صرت اعمى!
اعمى في وضح النهار
لاتقولي اي شي
لا تخافي انا حي
ضوء خافت
والشوارع فارغه
الا منك
في القصايد تسكنين
كل دقيقه اكتبك…
كل لحظه اعشقك…
ياسنيني اللي اوقفت
في يديني
تعرفي اجمل سنيني؟!
لما شفتك
ترسمين شفاتك بكل الورود
تدهنين الليل من حدة سمارك
ثم يقبل لك خدودك
لين تحمري خجل
مابقى فيها خجل
وانا ساكت
ماقتلني الا صمتك
هذا وانتي ماحكيتي اي كلمه
لوحكيتي؟
وش يصير
مااظن اني بحبك
لوحكيتي لوبكيتي
لن صمتك هو الكلام
وابلغ انواع العشق
واحلى مشروبٍ رشفته
رغم كوب البن بارد
خبريني من الاخير
لو حكيتي وش يصير؟!..

طلال الغساني

_________

لا تطول السالفه

لا تطول السالفه واهيه قصيره
اختصر هالحب كله باختصار
صارت القصه ترى جدا مريره
وانت متغير وغيرت المسار
لك محبه في خفوقي هي كبيره
وانت اعلنت فبعادك هالحصار
ليتها عندي محبتنا يسيره
كان ما صار البعد لو كان صار
وين نورك والدروب المستنيره
وانت كلك كنت وافي بك وقار
لك بقلبي شي واشياءن كثيره
ارجع وشوف بخفوقي الانتظار
مالي فبعدك على الاحباب سيره
دامك الواحد بعيني والجوار
جارت الدنيا وهي جدا عسيره
شوف حتى هالزمن من رحت جار
باتت عيوني وغلاتك بك سهيره
واشتعل فيني من الايام نار
والدروب اللي تودي لك ضريره
وانت معلن بالتمادي لك شعار
نور عيني وجهك بليلة منيره
كنها الاقمار سبعة بالمسار
رفقتك لا تغيب عن افراح ديره
ارحم اللي عاشك بك جو احتضار

حميد بن سعيد السعدي

إلى الأعلى