السبت 29 يوليو 2017 م - ٥ ذي القعدة ١٤٣٨ هـ
الرئيسية / أشرعة / الشعر الشعبي

الشعر الشعبي

عاشق .. و الهموم ثقال

لا ترهقي العاشق بكثرة سؤالك
ما ضر بالعشاق مثل السؤال
تجنبي .. كثر التفاصيل هالك
واستبدلي الشكوى بشي مـ الدلال
هارب و اعيتني اليك المسالك
تركت خلفي وادي هموم سال
كان الطريق أهوال مظلم و حالك
وكانت يدك ..كانت تنادي : تعال
أسرفت بك و البحر يودي المهالك
انا الغريق اللي كسره المحال
اشقتني الدنيا بكثر المسالك
يا حادي الشكوى همومي ثقال

طاهر العميري

حسراتّ

انته قضيت على الأمل كله ومات
وش لك بعد تطلب أمل انت قاتلهْ؟
وتعود بسمة ثغرك اليوم هيهات
دامن بقلبك كل ذا الغلّ حاملهْ
يا مأجّج بقلب الغلا شر حسراتّ
يعاملك حتما مثل ما تعاملهْ
ياما احتضن لجلك من الليل نسمات
واحضن خفوقك بين صدره وأناملهْ
كم ضوّ لك في ظلمة الليل شمعات؟
وانته على هذي المبادئ تجاملهْ
ﻻ تخترع من واقع الحب ازمات
ما دمت ﻻ ترغب تجيه وتواصلهْ
اهجر وجافي دامن الحب نزوات
من حبك بصدق ومشاعر تجاهلهْ
تدري الأمل من خافقي انتهى ومات؟
واصبح ضحية ظلمك وانت قاتله

سعيد الصلتي

كسرة فراق

قد لك معي شهرين ما قلت مشتاق
اثر المصارح بالمشاعر فضيحه
وانا على الغيبات محتاج ترياق
وصلك ضما والسحب دايم شحيحه
جوعت عيني والعشاء كسرة فراق
واقف و لو من عقب طيحه و طيحه
انام والقاني على متن الاوراق
ناثر وجع اهل القلوب الجريحه
من قال لك عشاق بالحب عشاق
بعض الحكي لو مات صدك ضريحه
على غصون الصبر لك كان ميثاق
تزيح بيدينك و عني تزيحه
اثر الغلا باقي على كل معلاق
نخفيه غير العين دايم تبيحه
لا يا زمان الضيق من سرّ بك ضاق
ضيقت بصدورٍ تراها فسيحه
كسر الخواطر ما مثل كسرة الساق
آقلها داوي و لو بالنصيحه
في حارتي بنتٍ لها ناب براق
افراح عقب الحزن صارت فريحه
امست غروب اليوم من عقب مشراق
بفراش عذل وضيم صارت طريحه
يا صاحبي كانك على العز تواق
اتبع مسير الشيخ كثّر مديحه
نتعب لجل من قال ياهيه برفاق
لبى العيون الواسعات المريحه
حدن يلمّع صورته بين الاعماق
شفها على الطعنات صارت قبيحه
ضايق و قلت اكتب بلا دمع حراق
ايدي تسابقني و سابق قريحه
باب العشق مفتوح من عقب الاغلاق
عبارتي بالبوح جاتك صريحه

علي الغنبوصي

تحرسك آااهاتي

نادی عليك الحال ما شاف زولك
غايب وعدن لك ثلاثين ليلۀ
كنك بها الإبعاد محدن يطولك
وكنك علی ما تريد جاتك جزيلۀ
بس لو تشوف شوي يا زين حولك
تلقی أحاسيسي بقربك نزيلۀ
لكن مع هذا جبرني رسولك
والتسويۀ مبدأ أساس الفضيلۀ
وش لي تبي مني فلحظۀ وصولك
تحرسك آااهاتي وزهابك تشيله
وأدري بها الأجواء يبقی ميولك
والبعض له أذواق لو زاد ميله
حطيتني ما بين لهفي وجفولك
أمسيت لا قوۀ ولا شي حيلۀ
مركب هوانا لو مكث به نزولك
ما كان تاه ولا فقدنا دليله
أنا معك من وين ما راح زولك
حتی ولو عدن ثمانين ليلۀ

سعيد بن خميس الرحبي

أعز احباب

أنـا لا جيت لك اعطش أبروي من غلاك انسان
بـدا حـظه يـصيـر أعمى ويدفن بالثرى احباب
أنـا ظـل انـكسـر وقـته رسم طيف الأمل ألوان
تـموت بـداخـله عـبرة جـروح وتـنتهي بغياب
صـباحـي يسرق انفاس الظلام وموعده اكفان
نـسج خيط الفرح شمسه نهار في سماه ثياب
خـطاوي رحـلتـه حـولـي بقى طيفه بلا عنوان
وأسـكنـت الـوهـم دربـه سـراب يحتويه تراب
أحس همسك شتاء بردك يسمعني دفاك ألحان
يـتوهـني صـدى حـسك يـحاكـي خافقي بعتاب
غــيابــك داخـلي قـصة حـكاويـها ألـم وجـدان
تـموت حـروفـها كـلمة يـدونـها الـعزى بكتاب
سـجودي دعـوتـي خوفي من ايام نست أركان
تصلي فرضها خمسة وتنسى دعوة المحراب
اشـوفـك داخـلي مـوطـن ذنـوب تطلب الغفران
وانـا كـلي ذنـوب اسـكنـتنـي ولـلذنوب أسباب
تــذكــر لـو تـفارقـني أبـبقى لـك وفـاء انـسان
ولـو حـظي يصير أعمى بتبقى لي أعز أحباب

محمد بن مبارك البريكي
al7sas21@hotmail.com

إلى الأعلى