الإثنين 16 يناير 2017 م - ١٧ ربيع الثانيI ١٤٣٨ هـ
الرئيسية / أشرعة / الأدب الشعبي

الأدب الشعبي

أجرح شعوري
خميس السلطي

فتش وتلقاني عذر في غيابك
أجرح شعوري واكسر البعد بابه
اصرخ بوجه الهجرْ وبنارك اشعل ..
أضلع ودادي وتنوقد نبض غابة
هذا الألم حطّاب لعيونك الطهر
مفتون فيني فاق حد الغرابه
لأجل الغياب يفوق حارس خيالك
مديت أطراف الوصل بانسكابه
جربت حظ الحرف ما تبّسم الحرف
حرب الشعر مشدود باطراف نابه!!
جاحد غيابي وكنت ادري بغيابك
مـــريت بعيونك سما من كآبه
ناديت وعيون الملا طوّقتني
عيونك الفرقا رمتني سحابة
لا ارض تأوي قطرة الهم لا بحر
لا جوف ياخذني وطن في رحابه
وش سالفة حلم الحضور المكدّر؟!!
مجروح وصله وما يلاقي جوابه
اغيب وابعد والبس الليل ثوبي
واعيش لعيونك وهم باضطرابه
فتش وتلقاني حضور بغيابك
ما غيرّت قلبي ظروف ومثابه
_____________

انا محتاج لك ..

عبدالله‬ بن حمدان الكعبي

انا محتاج لك .. ما هو عشاني
عـ شان احلامنا اللي في مهدها
انـا محتـاج اعيشك عمـْر ثـاني
عـمر يـاخـذ تفـاصـيلـي بيـدها ..
تعـبت وكـل ما فينــي يعـاني
ومعانـات الظنـون أشـد و اْدهـا .
تعال اجلس هنا اجلس : مكاني
ابيك تحس بي و أمـشى بعدها !
انا لو قلـت احـبك مـا مداني
مدامك نفس ما توفي : وعدها !
يموت البوح في طارف لساني
معـاناتـي تعبت ازفن مسدهـا !
اذا لك شي .. دؤر عن مكاني
ومصير الراحـله ترجــع بلدها !

________________

من المستفيد

سعيد بن خميس الرحبي

إن قلت أنا إي نعم .. أو قلت
لا شو الجديد
روحي وأسرابها بدنيتك حاضرة
فوضى مكانك تعدت ما هو خلف الجليد
والريح تزحف وشطآن الأمل
باخرة
جرد تفاعل غيابك كل وقت سعيد
وفجأة تلاشى بخفة برده وعاطره
يا قلب هو لي متى تبقى القريب البعيد
قرب عشان الحياة تكون بك زاخرة
انته وأنا هكذا عشقن لحاله فريد
توأم محبة صفات أرواحهم طاهرة
تعال من لهوك اللي هد جسر الحديد
فل صوبي الطيبة إجعلها كذا
مغامرة
ما كل من هو على ظهر البسيطة جهيد
لكن منهم غدى أشلاء متناثرة
رش الدروب العطر .. أو رشها بالمبيد
دربي ودربك على نفس الخطى سائرة
في ذمتك من هو فينا المربح المستفيد
هو أنت والا أنا .. أو صفقة
خاسرة ؟

__________________________

انا حزين

عبدالله بن سعود الحكماني

انا حزين وضايقٍ بي شعوري
عندي فراغٍ عاطفي ودي املاه
الهم كفني و الليالي قبوري
والزاد والمشروب ضيقه ومجفاه
صاير غيابي نائبٍ عن حضوري
اغدو مع الهاجوس ومسي مع الآه
من يوم عني راح بو ورد جوري
اللي عن العالم فريده مزايااه
غادر و خلاني عسيره أموري
اعيش لحظة حزن طاغي وماساه
انشهد ان الحب لمحب دوري
وانا خسرت الحب فاول مباراه
يمعذبي بالله جفت زهوري
فاجيتني بالصد ياهي مفاجاه
من قبل حبك كان قلبي صخوري
واليوم فجره الجفا واندفق ماه
اهات حزني كم تهدم جسوري
اللي قواعدها من الصبر مبناه
وانا دخيلك كان تقرا سطوري
تشعر بما فابياتها من معاناه
ارجوك تتأمل وترعى شعوري
سد الفراغ العاطفي وعندي املاه

_____________________

داخل حدودي

محمد المغضي

داخل حدودي/ وحدتي/ شاي/ دخّان
اخضر جراحي / جيب خالي بثوبي
فوضى ترتبني .. على كيفها انسان
إنسان يسأل ../ عنّي اخر ذنوبي
الباقي من صوتي.. وانا اقول / تعبان
اخر خطاوي ../ للصباح بدروبي
احمل لبكره/ فكره/ حتى اذا كان:
بكره / اقول لنفسي : بالله توبي
اجمع غيابي / واترك اوراقي بيبان
يمكن حضوري.. فكّر يمر صوبي
واحلم أعيش / وافتح الصبر دكّان
احلم بلادي../ عنّي تستر عيوبي
جايز/ انا الصحّ الذي كان غلطان
ياديرتي/ لا صار فيني هروبي

إلى الأعلى