حمل المفارق

محمد الهنائي

كد حملي المفارق رحمتك يالطيف
غزّر الناب صدري والحزن بي ضوى
عاصف الوقت يذري و الاماني خريف
تسقط اوراق فرحي لين عودي لتوى
من يقول المفارق وقع جرحه خفيف
قولي والله بعمره ما عرف له هوى
العشق سلك ناره ينتشربك، مخيف
يكتوي في عروقك، ماوجد له دوى
واهي الصدر كأنه بداخلي وقت صيف
من كثير اشتعاله بكل عرقٍ ذوى
عشت دونك حياتي ياحياتي كفيف
كل ما مر طيفك شوق قلبي عوى
لوخذتك المسافه لك بعمري رصيف
وكل نبضي شوارع والنفس محتوى

___________________

وصف الراحلين

خليفة الغافري

الكلام يضج في جوف الحنين
بس ما تقدر سطوري تجمعه
الجروح اللي تورثها السنين
تترك أبواب الصدور مشمعه
ليت شوقي نام ضمن النايمين
ليت طرف الحلم فارق مضجعه
صرت أدور في وجوه العابرين
عن قصيد يجمعه اللي ضيعه
للغياب .... اللي سأل رايح لوين ؟
ليت من حضن الظروف أسترجعه
ساحلي ،،،، حلم الحيارى المتعبين
كلهم وتمر سفنه مسرعه !!!
كيف طيفه إنزرع في كل عين
صورته ف كل الجهات موزعه
سامعي بالصبر وان عزمك يدين
لا تدور في الرجاوي منفعه
لو نهار البين في كونك يبين
يوم خِلك يهدي للريح أشرعه
لا تظن الدرب من يلفظ ضنين
يقدر بكل الوسايل يبلعه
سامعي نصحي إختصرته بكلمتين
لو يدور الكاس لك تتجرعه
ان ف خلك بان وصف الراحلين
لا تحاول تمنعه و إرحل معه

____________

يتبع...

عبدالله بن سعود الحكماني

فيك اموت ولك غلا ينبع
وانت ما تدري كثر حبّي
وعيني اللي منك ما تشبع
يا عساه ايعينها ربّي
عندك ايّامي كذي تربع
دون لا ادري وش اتخبّي
واسمك اللي بالحشا يطبع
جملة احروفه سكن لبّي
خلّ حساّد القفا تقبع
خلف يللي عنهم انغبّي
وخلّني لك فالسعد منبع
واعتمدني لامرك املبّي
والشعر ماينتهي / يتبع ...
دام قلبي حبّ متعبّي

_______________

الحزن الأزرق

راشد الضاحي

هلّي يا ديمة غلا روحي وبلّيني
ما عاد لي غير هذا الفقد ومحوله
تحت الحزن بين وقع الدمعه وبيني
خرْسَت ردوني ...ثلاث سنين مبلوله
فكّيت حلق المحاني ..يمكن تجيني
لو قطرةٍ من بقايا الوصل مرسوله
مثل العصافير تتهافت شراييني
سدّي رمقها بأية شي .....مقبوله
خايف أناديك .....تتشتت عناويني
وتتوه بين الصدى والصوت.. مذهوله
وخايف أغنّيك يتراقص حواليني
الحزن الأزرق يجي بغناه وطبوله
عكس أتجاه المطر ترقى لك يديني
تبلّ غيمك ...عسى يشعر بأحد حوله
والريح تعزف على سمعي لحن عيني
تجرفني لديرةٍ بالفقد مأهوله
بين أنتكاسة وفاك وربكة سنيني
كم عاااام روحي تحت رحمتْك مذلوله
أسأل بروقك عن غيابي ...أنا ويني
من تهت بك شوفي هذا الدرب وش طوله
من كثر م انتي على نفسي تصبّيني
ثَمَرْت بين الظماا والحزن وفصوله
هلّي حوالَين دمعي ... لا تهلّيني
خرْسَت ردوني ...ثلاث سنين مبلوله

___________________

يوادعـني

زايد العميري

يوادعـني بلا موعـد وش اللي حـدّ عـ الرجعه
وش اللي ذكره فيني عقب غيبة ثلاث سنـين
ضميت وقلت يسقـيني وأنا واقـف على نبـعه
ورد غيري وروى منه وأنا مصـدّر خلـيّ ايدين
يماريـني على حزني وعيــني تحـبس الدمـعه
واخاف أقول له تكفى!وتكفى عـ العرب سكين
يمــر فــ حــلم قــــدامي يناديــني ولا ســمعه
علـى طـاريه ما ودّي أفـوق وواقـعي تخمــين
عطـيته كل شـي يمكن يلـم الشــمل و الجمـعه
وأقـول انه عسى باكــر يجـمّع بــ الغـلا قلبــين
أسـامح كيف؟! مو ممكن ، طريقٍ جابه يرجـعه
رحمك الله يا عـام التـلاقي فـ خمسه وتسـعين

________________

ارتياح

سعود الشيذاني

التبرّع بالدماء أجره رفيع
خير تجزا به وصحّه وارتياح
ربما تنقذ بدمّك حد وجيع
او تضمّد له أنينه والجراح
باسمي أتكلّم كلامي للجميع
والتحيّه ف البدايه والسماح
للتبرّع كل واحد مستطيع
انفرو والخير له ناس الصلاح
أنتم اهل الخير والفعل السريع
وانتم أصحاب الكرامه والسلاح
ما يضيع الأجر كلاّ ما يضيع
ون يطول الليل يأتيك الصباح
لاتخلّو هذي الفرصه تضيع
رب قطرة دم تجزيك الفلاح
ارسمو الفرحه على فم الرضيع
وازرعو هالارض فرحه وانشراح
خلّو الدنيا كما فصل الربيع
فانتم اللي طيب لامن فاح فاح
بارك الله حفلكم هذا الوسيع
والسلام أهديه ما رفرف جناح