الثلاثاء 30 نوفمبر 2021 م - ٢٥ ربيع الثانيI ١٤٤٣ هـ
الرئيسية / أشرعة / الأدب الشعبي

الأدب الشعبي

دقيقة:
حمود المخيني

بعد باقي دقيقة يا حبيبي لا تروح الحين
اريد استمتع بهذي الدقيقة معْك لاخرها
دقيقة واحدة! تكفي ترجعنا سنين سنين
(شريط الذاكرة) يستذكر أشيا.. حن ما نذكرها!!
تنفّس.. خلّني أشعر بأنفاسك من الرئْتين!
كئيب الجو من بعدك.. خذ الدنيا وعطّرها
تكلّم.. قول حاجة ما تروم تقولها بعدين..
أنا حتى (العبارات المسيئة) منْك أعذرها
خذ عيوني.. دموع الحزْن تحتاج لـْ عيون اثنين
دموعي..- من عرفتك لين هذا اليوم- ذاخرها!!
حبيبي يا حبيبي يا حبيبي لين يوم الدين
قبل تسبقني اللحظة معك،، خلْني أكرّرها!!
بعد باقي ثواني من الدقيقة، لا تروح الحين
ثواني معكْ تكفي (نختلق ذكرى) ونذكرها!

_______

عذرك صدني

محمد الخزيمي

حطبت لك ضلعي دفى … لكن عذرك صدني
والدمع م القسوه توارى خلف جفنيني وذاب
كنت اظن الشوووق مر … ولين شوقك سمني
والخفـوق إلي دموعـه … تملي القفرا هضاب
جيت برمي عن كتوفي ،،، شوقي الي هدني
في بحور الصمت لكن موجها كشار ناب !!!
جرحك العامر ب صدري .. صوب دربك تلني
وإنحنا لجلك تواااضع … ليت تهدينه عتاب
فتشي بين القصايد ، ليت تلقيني هني ؟!
الله أعلم ما بتلقيني سوى أخر كتاب …
تهت في رحلة ذهابك .. .. لين صمتك ردني
للمطار وقلت أبرجع .. قال ما فيها إياب !!
الرصيف يقووول وووينك ؟! ليت لو بتمرني
والشوارع في غيابك … تشتكي طول الغياب
تذبل أزهـار المدينـه !!! والحـزن فيها غنـي
والمشـاعـر سـافـرت والـغـم : للرحله زهـاب..

_________________

كل انتظاراتي ..

أحمد المقبالي

وجع گل إنتظاراتي يموت ف موعد أعيادي
إذا دقتّ عقارب ساعتي تسعه ..شهر ستّه
معا دقّة عقاربها…أحس فوادي يناااادي
كسر صمت المدى نبضي..وصوتي ما گسر صمته !
ينادي نبضي الثاير و يسمع نبضه الهاادي
أنا قادم يا ميلادي و ميعاادي بدا وقته !
ف هذا اليوم مولد حبّي السامي و ميلادي
غرام يجدد سنيني،، غرام أجوبته أسئلته !
أجيه بلهفة الضاامي وطيَر غثَة سهااادي
رغم كل التعب فيني عتب هالبعد ما شلته !
أجي شايل معي باقة قصيد و شايل فوادي
مثل ما جاب لي قلبه قبل عامين أنا جبته!
ويسرقني من الواقع و أشوف أحلامي تنادي
لقت ف عيونه النجلا وطن ما يوم أنا عشته
و إذا قام و لفاه الريح عوده زعزع عنادي
لساني ما قدر يوصف من الإعجاب ما شفته!
تشگّل مثل ما أتمنى و صار لجرحي ضمادي
عقب رحلة عجاف شعور خفّافي صحى بخته!
من فوادي أنا أحبه ،، وحبّه ما هو بعادي..
لو إن العشق ،، دين ف قبلته فرضي ونافلته!
أحبَه حبّي الأوَل،، أحبّه ..أجمل أعياادي
أحبه كثر ما قلته،، و أحبه كثر ما قلته..!!
أحبّه ومن كثر حبَي لميعاده و ميعادي
قسم بالله لو أقدر،، معاه الوقت وقّفته…!

_____________

ليلة خميس

معتصم بن طويرش السعيدي

هجّيـت في ليلة خميس وصادحٍ موالــي
مضمونه اني ما قويت ابوح عن مضمونه
لي عام وهمومي معي في حلّي وترحالـي
اللي وفالي ضيقةٍ وسط الصّـدر مسجونـه
وسافرت عن شيٍ كسرلي هامتي وآمالـــي
من آخــر حدود الحياة المـرّه المشحونــه
لبعيد عن شرذومــة اللي ما درو عن حالي
لبعيد يا عمر الضمــا والدمعــه المغبونــه
الّا .. على ذكـر المدامع .. كيفهــم عذالي؟
قدهم على حفـر الجروح بخنجـرٍ مسنونه؟
قدهم على حطّت يدينك همّهم غربالـي؟
ما بينــي وبين السعادة سدّهــم يبنونـه؟
ويا من تفرّد بــك قصيدي اسمعي للتالـي
شاعرك له قلب انفطر من خافيات طعونه
يا ليت لو جنّبت درب العاشقين اشوالـي
للعشــق دربٍ شايــكٍ يـدروه من ياطونــه
لا وا هنــيّ اللي ينــام ولــه فــوادٍ خالــي
قـولوله يقاســـم عيوني من حظوظ عيونه

_______________

غايب

محمد الوحشي

غايب ونار الهجر هالــيوم منـــطفه
يامبطي الشوف وانته عندنا المغنم
لا تقول مزن الغزل والشوق وش دفّه
دفّه قبالك وهــو من دفـــته يــــرزم
يلـي حيايــيـك منـــحفّـه بلا حـــفه
ادقاق كن اللضى من قوســها تضرم
وتســلهم بعينـك الشــهلا واتــــرفه
وحراس عيـــنك تظلل وانته تسلهم
وخنجر يمانيك متورد على عكـــفه
حدّه يقــص القرايـن هوب مــتثلم
وتلد فيّـــــه وتتبــــسم من اللهـفه
يا عجبت الله كيف التوت يتــبسم
حبيبتي والدوا بعينـــيج والشـــفه
أنا فدا العيـــن وانا فـــدوة المبسم
العالم بكــف وانــتي روحـك بكــفه
ولا غالي عنـــج الا كــل من يعـــلم
اذا انظرتج العـــروس ان كان منزفه
تغـــشى بفرحــها وتتنــبه وتتبــــلم
خذيـتي الحــسن ما بقّــيتي النـفــه
اللي تنـــف الصبــايا وفيــه تـتحــلم

إلى الأعلى
Copy link
Powered by Social Snap