إليهم ..

سلم على قلبك وسلم على عيدك
أفراح عيدي بعد فرقاك محتشره
أنا وحيدك وانا ألوان تجريدك
وانا الوفا لك من الواحد إلى العشره
من قال أنك جفيت وجف تغريدك ؟
والله انك تمر وتلمس البشره
شعوب في داخلي تعشق ظما بيدك
الله يلعن نوايا ناكر العشرة
من غبت واشيائي المحزونة تزيدك
والغايب إنسان/ بس اشياه منتشره
ملامحك ، ضحكتك ، دقة مواعيدك
من صفو ذاكرتي إلى هالساعة القشره
كنت أنزف جروحي الحمقى على إيدك
واجيك أبكي من همومي لك .. وأشره
أحتاج لك حاجة الجوع لعناقيدك
واحتاج لك حاجة المغرور للفشره
كل الزوايا بتسألني : رجع سيدك !!
واتعمد اغسل جروحي وأنهي النشره
ربي يطهر ثراك ويا عسى عيدك ..
في جنة" ما بها ضيقة ولا غشره

عبدالحميد الدوحاني

_______________

يزعلون الحبايب

يزعلون الحبايب من بعضهم كثير
و الزعل لو يطوول ما يجيب الرضا
والرضا انك تشوف اللي تحبه بخير
و السماحه فضيله و التجافي غضى
اااه يا طول ليلي .. ذكريات و هجير
اواااه يا حر مابي ..منه جوفي نضى
يا غصون المحبه ما بقى فيك طير
مدري الحظ اقشر والا حكم و.قضا
ما حسبت المسافه في حدود النظير
المسااافه عمر ..و العمر الاول مضى
و لي تبقى حسايف يا غناة الضمير
و الحسايف كلايف جمر شوق ولظى
رغم إني حملت المسك حس و اثير
نافخ الكير جاني من نفيخه شضى
و القلوب الوفيه ... للتسامح سفير
العتب ما يرجع لي مضى و انقضى
دام قسوة زمانك تدفعك للمسير
يمكن البعد خيره ...في حدود الرضا

راشد السعدي

________

اغتابني ما تشا

تركت لك باب للظن، و مفاتيحه
اغتابني ما تشا، يا اجمل احبابي
سلّمتك القلب و تفنّن ب تجريحه
لو ما رضيت بكلامي وقسوة عتابي
راضي غرامك.. وراضي منه تبريحه
ظنّيت بك خير حتى لو تعنى بي
يجتاحك الشووق ،وادري صعبه تبيحه
ما دام يملي فراغ الوقت ف غيابي !
وادري بكلامك له ابعاده و تلميحه
ما تقصد الشّك..قصدك تلفت اعجابي
يا مغرمي بالهوى.. لو للزعل ريحه
لثّمت قلبي قبل لا تفوح اعصابي !
البعد ما هو ستار و نقدر نزيحه
ان غبت عنك امانه قدّر اسبابي
ما فرّقتني عن الاحباب تلويحه
يبقى خيالك معي، حارس على بابي
اهجر ظنونك ، ترا الاوهااام نزّيحه
طول الغياب ألمحك في بسمة اصحابي
لو هي على الليل، عندي الليل تسريحه
اوقف عليها أصفّ النوم بأهدابي
ما عاد به وقت للهّم و ترانيحه
ولا صرت مثلك ازاعل و اشنع ثيابي
لو كان طبعي اعاتب،، طحت بك طيحه
لكن هالقلب ما يرضى على احبابي !

راشد الشعبني
____________

القلب مرفا

ماعاد احس الشعر منفى
او خان هالبوح فالغيبه !؟
لي طبع ما شوف (من قفّى )
وكم راح غالي ولا دريبه
عادي ترى القلب هو مرفا
كلٍ رمى الحمل في جيبه
واللي يضم همّ ما يغفى !
والنوم من هو له يجيبه !؟
والعشق فالعين مايخفى
ينبت سهاده وذا عيبه
وياسيدي الا انت ما تعفى
ترضى تخلي الولد شيبه!
ياسيدي الشعر ما يصفا
إلا ب وفاء يفوح لك طيبه
كنت اعشق الليل لي منفى
واليوم صدره نبت ريبه !!
مر العمر دون مايشفى
جرح نزف رضف تعذيبه
صدرٍ ثلج مالقى مدفى
وجرح به الملح تذري به
مع كذبة الصبر له ملفى
حتى الصبر شق له جيبه !!

أحمد البوسعيدي

____________

برق الغيوم

اشوف رعد وبرق والليله غيوم
والجو يمطر يا عسى دوم غايم
والناس تتباشر من اخبار وعلوم
يلا بصباح الخير كله نسايم
والفرح فوق الناس يا ربي يدوم
يا الله عساه بطيرة اليوم حايم
دام الغلا قلبي حلف مابه يسوم
يبقى الحزن طالع من الصدر نايم
الرزق من رب البشر دوم مقسوم
ربي بيرزق عبده احسن غنايم
الرزق ما ياتي لمن طبعه النوم
الرزق ياتي للذي يسعى دايم
وضع الحياة بطبعها صار مفهوم
يبقى الذكي فيها بيوضع علايم
وانا كبير الراس مو دايم اشوم
الا عن دروب الردى دوم شايم
ماني من اللي بات في ليل مهزوم
احب انا العليا وللمجد رايم
اشوف برق ورعد والليلة غيوم
يالله تلطف دوم جوي بنسايم

حميد بن سعيد بن سالم السعدي